ტრამპი და მიგრანტები – ლიბერალური საემიგრაციო პოლიტიკის დასასრული?!
20 იანვარს, ამერიკის შეერთებულ შტატებში, ახლადარჩეული რესპუბლიკელი პრეზიდენტის, დონალდ ტრამპის ინაუგურაცია გაიმართა. სადაც სიტყვით გამოსვლისას, ტრამპმა გააკეთა განცხადებები, რომლებიც დანარცენ მსოფლიოზე დიდ ზეგავლენას ახდენს. ამჯერად განვიხილავთ ერთ მათგანს – მიგრაციას ამერიკის შეერთებულ შტატებში.
ჩვენს კითხვებს პასუხობს ტუროპერატორი ენო ხუტაშვილი.
– ენო თქვენი აზრით რას უნდა ველოდოთ პრეზიდენტ ტრამპისგან მიგრაციის საკითხთან დაკავშირებით?
ტრამპის მოსვლამ უკვე გამოიწვია ხელშესახები ამბები ამ საკითხში. დღეს დილიდან ფაქტიურად არ მუშაობს ამერიკაში მოსახვედრი აპლიკაცია „cbp one“, რომელიც მიგრანტებს მთელი მსოფლიოდან აძლევდა ამერიკაში ლეგალურად მოხვედრის საშუალებას. კარგად რომ წარმოვიდგინოთ, ეხლა ამ მომენტში საქართველოს ასობით (თუ მეტი არა) მოქალაქეა მექსიკაში მოლოდინის რეჟიმში, რომლებიც კანონის თანახმად ჩავიდნენ მექსიკაში, გაიარეს ყველა საჭირო კანონიერი პროცედურა და 4-6 თვეა ელოდებიან თავის რიგს საზღვარზე მისასვლელად და თავშესაფრის მოთხოვნის პროცედურების გასავლელად. გარდა საქართველოს მოქალაქეებისა იქ მთელი მსოფლიოდანაა ხალხი თავმოყრილი და ეს არ არის მცირე რაოდენობა.
ცოტა ხნის წინ, ასევე მექსიკის პრეზიდენტმა გააკეთა განცხადება, სადაც ამბობდა, რომ მექსიკის ხელისუფლება ელოდება ტრამპის ადმინისტრაციისგან ინფორმაციას, თუ რა მეთოდებით მოხდება ამ ადამიანების მიყვანა საზღვრებთან, რა რეგულაციები და წესები იარსებებს ტრამპის ადმინისტრაციის პირობებში… ამ მომენტის მდგომარეობით, როგორც ვხვდებით და ვაანალიზებთ შექმნილ სიტუაციას, რეალურად პასუხი ამ კითხვებზე არ არსებობს და ყველა მოლოდინის რეჟიმშია .
– როგორ ფიქრობთ რამდენად შესაძლებელია რომ ამ ხალხს საერთოდ უარიეთქვას თავშესაფროს მოთხოვნაზე?
ჩემი აზრით ეს არ მოხდება, რადგან დევნილების მიგრაცია რეგულირდება გაეროს მიერ მიღებული დადგენილებებით და მას ემორჩლება ამ ორგანიზაციის წევრი ყველა სახელმწიფო, მათ შორის აშშ. ამის გარდა, ესეთი ხისტი გადაწყვეტილებები ამერიკისთვის ბევრად დამაზიანებელი იქნება ვიდრე სიკეთის მომტანი. როგორც დრომ გვაჩვენა, მაშინ როდესაც ლეგალური მიგრაცია იზღუდებოდა, იზრდებოდა არალეგალური უკონტროლო მიგრაცია, რამაც საბოლოოდ გამოიწვია ამერიკის სამხრეთ საზღვრის ცნობილი კრიზისი.
დღეში ყველაზე მეტი 10 000 ადამიანი კვეთდა საზღვარს არალეგალურად 2023 წლის მონაცემებით. შემდეგ, ძალიან ბევრი იმუშავეს იმაზე რომ ეს ციფრი შეემცირებინათ და ყველაფერი მოექციათ კანონის ფარგლებში და დაექვემდებარებინათ კონტროლისთვის. ესე მარტივი არაა – ვიღაცას მოუნდა და საზღვარი გადაკეტა! მექსიკა ამერიკის საზღვარი 5000 კილომეტრამდეა და აქედან ღობით დაცული ნაწილი მხოლოდ რამდენიმე ასეული კილომეტრია. ასე, რომ არც ესაა ამერიკის დაცვის გარანტი. მე მინახაცს უამრავი ვიდეო, სადაც ამ ღობესაც ძალიან წარმატებით ლახავს მიგრანტების ჯგუფები …
– თქვენი აზრით, რას შეიძლება ველოდოთ, რა არის აზრი და მიზანი cbp one – ის გათიშვის?
მე ვფიქრობ ეხლა მიდის ახალი წესების შემუშავება და დადგენა, თუ ეს უკვე დადგენილი არაა… უახლოეს დღეებში კიდევ და კიდევ მეტ განცხადებას ვიხილავთ, რაც საბოლოოდ მოგვცემს იმის საშუალებას, გავიგოთ რასთან გვექნება საქმე. ეხლა რაიმე კონკრეტულზე ლაპარაკი არ მიმაჩნია სერიოზულად. პრეზიდენტი ტრამპი არ არის მხოლოდ ამერიკა და ამერიკის საემიგრაციო პოლოტიკა. აქ შეუქცევადი პროცესებია რომელსაც ესე ვერავინ ვერ შეაჩერებს.
ასევე გასათვალისწინებელია, რომ წლების განმავლობაში ამერიკაში მიმავალი ხალხი ქმნის მექსიკის ეკონომიკის დიდ ნაწილს – სასტუმროები, კვების ობიექტები, მგზავრობა, შიდა ფრენები, სახმელეთო ტრანსპორტი… ეს დიდი მანქანაა, რომელიც წლებია მორგებულია ამ ყველაფერს… ესე, ერთ დღეში ამას ვერავინ ვერ შეაჩერებს. გასათვალისწინებელია ისიც, რომ მექსიკა ეს არ არის ის ქვეყანა, სადაც კანონის უზენაესობა სუფევს.
ფული და შემოსავალი როგორც კი მოაკლდებათ მექსიკელებს, აუცილებლად გაჩნდება უამრავი გზა ამერიკაში მოსახვედრად, რომელსაც ვერ გააკონტროლებს ვერავინ. აქედან გამომდინარე ტრამპის ეს განცხადება, ჩემი აზრით, ცოტა პოპულისტურიც კი არის. თან უნდა გვახსოვდეს, რომ ის ხელისუფლებაში დიდი დეპორტაციის და მიგრაციის პოლიტიკის გაჯანსაღების პირობითაა მოსული… თუმცა მიგრანტების დაარსებული ქვეყნის მიერ მიგრაციის პროცესის აკრძალვა – არასერიოზული განზრახვა მგონია…
ვნახოთ უნდა დაველოდოთ და გავიგებთ ყველაფერს. არ ღირს ეხლა ზედმეტი ფორიაქი, თვითონვე გვეტყვიან ყველაფერს … ასევე მნიშვნელოვანია გავითვალისწინოთ, რომ ადამიანები, ვინც თვეებია უკვე სწორედ ამერიკის საემიგრაციო პოლიტიკის თანახმად დადგენილი წესებით და კანონებით მოქმედებდნენ და ელოდებოდნენ თავიანთ რიგს მექსიკაში, ეს ხალხი ვერ იქნება უბრალოდ მიტოვებული და მოტყუებული. მე, სიმართლე გითხრათ, ამის მოლოდინი საერთოდ არ მაქვს. ეს ადამიანის უფლებების უხეში დარღვევაა.
ყველა მათგანი, ვინც ეხლა მექსიკაშია, რაღაც კონკრეტული მიზეზით ითხოვს თავშესაფარს ამერიკისგან. ეს მიზეზები საერთაშორისო კონვენციებითაა დადგენილი, თუ რის გამო შეიძლება ერთი ქვეყნის მოქალაქემ მეორე ქვეყანას მოთხოვოს თავშესაფარი და ასევე კონკრეტული ნორმებითაა გაწერილი სახელმწიფოების სამოქმედო გეგმა. ამ წესებს ესე უბრალოდ ვერავინ ვერ დაარღვევს, რამდენადაც რადიკალურად არ უნდა იყოს განწყობილი ესა თუ ის მმართველი. მითუმეტეს, როცა ვლაპარაკობთ ამერიკაზე და არა აფრიკის რომელიმე განუვითარებელ ქვეყანაზე . რამდენადაც ამაფორიაქებელი არ უნდა იყოს, უნდა დაველოდოთ და გავიგებთ ახალ წესებს ამერიკაში მიგრაციის მსურველთათვის.
წყარო: “გზამკვლევი”
ასევე დაგაინტერესებთ: ERMES TV და “გზამკვლევი” პარტნიორები გახდნენ
