9-12 სექტემბერს საქართველოს ქვიშის ფეხბურთის ეროვნული ნაკრებისთვის უმნიშვნელოვანესი პერიოდია. გუნდი იტალიაში, ქალაქ ვიარეჯოში იმყოფება და A დივიზიონში დასარჩენად იბრძოლებს.
ERMES MEDIA ამასთან დაკავშირებით ზურა მჭედლიძეს, ნაკრების მწვრთნელის ასისტენტს ესაუბრა: “ნაკრები უკვე ვიარეჯოში იმყოფება და 9 სექტემბრიდან უმნიშვნელოვანესი თამაშები გველის. 9, 10 და 11 სექტემბერს ლატვიას, თურქეთს და ესტონეთს ვხვდებით:” – აღნიშნავს ზურა მჭედლიძე.
საქართველოს ქვიშის ფეხბურთის ეროვნული ნაკრები, ბოლო წლებში, ერთ-ერთ ყველაზე სწრაფად განვითარებად გუნდად იქცა ამ სპორტის ევროპულ სივრცეში. გუნდის მართვა, საქართველოს ფეხბურთის ფედერაციას, აჭარის ფეხბურთის ფედერაციას და ქვიშის ფეხბურთის ფედერაციას ეკისრებათ. მთავარი მწვრთნელის პოსტს იტალიელი მასიმილიანო დე ჩელისი იკავებს, რომელსაც წარსულში გერმანიის, უნგრეთის, მალტისა და ნორვეგიის ნაკრებების ხელმძღვანელობის გამოცდილება აქვს, ხოლო მისი ასისტენტი იტალიაში მოღვაწე ქართველი მწვრთნელი ზურა მჭედლიძეა.
ქვიშის ფეხბურთში საქართველოს ნაკრებმა პირველად თავი 2008 წელს მოისინჯა, როდესაც მონაწილეობა მიიღო მსოფლიო ჩემპიონატის საკვალიფიკაციო ტურნირში. 2024 წელს ბათუმში გამართული ევრო ლიგის B დივიზიონის ეტაპი საქართველოსთვის გარდამტეხი აღმოჩნდა. გუნდმა ლატვია 6:1 დაამარცხა და უნგრეთთან 4:5 მარცხის მიუხედავად, A დივიზიონის მონაწილეთა შორის მოხვდა. ეს საქართველოსთვის პირველი შემთხვევა იყო, როდესაც ევროპის ყველაზე ძლიერ ნაკრებებთან თამაშის შესაძლებლობა მიეცა.
A დივიზიონში დებიუტი 2025 წელს, კვლავ ბათუმში შედგა. პირველი მატჩი ესტონეთთან საქართველომ წარმატებით ჩაატარა და 3:2 იმარჯვა. თუმცა, პორტუგალიასთან გამართული შეხვედრა რთული გამოდგა. მსოფლიო ლიდერმა ქართველები დაამარცხა. ამჟამად, საქართველოს ნაკრები, როგორც აღვნიშნეთ იტალიაში იმყოფება და A დივიზიონში დარჩენისთვის იბრძოლებს.
ასევე დაგაინტერესებთ: ᲒᲐᲛᲐᲠᲯᲕᲔᲑᲣᲚᲘ ᲥᲐᲠᲗᲕᲔᲚᲘ ᲡᲞᲝᲠᲢᲡᲛᲔᲜᲔᲑᲘ ᲓᲐ ᲒᲐᲬᲑᲘᲚᲔᲑᲣᲚᲘ ᲕᲔᲢᲔᲠᲐᲜᲘ (ᲣᲑᲘᲚᲔᲗᲝ) ᲒᲣᲚᲨᲔᲛᲐᲢᲙᲘᲕᲠᲔᲑᲘ
