ქართველი მორაგბე იტალიაში – სანდრო ბერულავა, ახალგაზრდა პერსპექტიული ქართველი მორაგბეა, რომელიც იტალიაში ქალაქ ორვიეტოში ოჯახთან ერთად ცხოვრობს. სანდრომ რაგბის თამაში 2013 წელს, 7 წლის ასაკში დაიწყო, ამჟამად ქალაქ ვიტერბოში, იტალიურ კლუბში LAIONS აგრძელებს რაგბის თამაშს, სადაც ადგილობრივმა პრესამ ერთ-ერთ ყველაზე წარმატებულ მოთამაშედ დაასახელა.
სანდრომ საუბარში აღნიშა, რომ ძალიან უყვართ გუნდის წევრებს და მწვრთნელს და ყველაფერს აკეთებენ იმისათვის, რომ მათ გვერდით ითამაშოს. ERMES TV წარმატებებს უსურვებს ახალგაზრდა მორაგბეს და გთავაზობთ მასთან ინტერვიუს.
– 7 წლის ვიყავი, როდესაც დედამ და ოჯახის ახლობელმა რაგბზე მიმიყვანეს. პირველად მივედი კლუბ “ჯიქებში“, სადაც ჩემი მწვრთნელი იყო დიტო კიკნაძე, შემდეგ გადავედი კლუბ “ხულიგნებში“, მაგ დროს მწვრთნელი იყო გიორგი შკინინი, საქართველოს რაგბის ნაკრების ყოფილი წევრი, შემდეგ გადავედი კლუბ “აკადემიაში”, მწვრთნელი იყო ნიკა ჩიტაძე. საქართველოში 16 წლამდე მომიწია თამაში.
– მოგვიყევით, იტალიაში გადასვლის შემდეგ, როგორ გაგრძელდა სარაგბო კარიერა?
– თავიდან დაიწყო სირთულეებით. საბუთის არქონის გამო, 5-6 თვე თამაშის შორიდან ყურება მომიწია. იყო გარკვეული სირთულეები, რის გადალახვაშიც ჩემი ოჯახი დამეხმარა, ასევე მინდა აღვნიშნო, რომ ძალიან დამეხმარა ჩემი ყოფილი მწვრთნელი საქართველოდან გიორგი შკინინი, ყველანაირად შეეცადა დავერწმუნებინე, რომ ეს პრობლემები მოგვარებადი და დროებითი იყო. ასეც მოხდა და ძალიან დიდი მადლობელი ვარ მისი.
– თქვენი პირველო კლუბი და მწვრთნელი იტალიაში…
– ჩემი პირველი კლუბი არის LAIONS, მწვრთნელი არის დონატო, რომელიც ძალიან დამეხმარა ენის ბარის გადალახვაში და გუნდთან ადაპტირებაში.თავიდან ახალგაზრდულ გუნდში ვთამაშობდი, შემდეგ დიდებში გამომიძახეს.
– იტალიურმა გამოცემამ გამოაქვეყნა თქვენზე სტატია, როგორც ნიჭიერ გამორჩეულ მორაგბეზე…
– ადგილობრივმა გამოცემამ ჩემი გუნდი რამდენჯერმე დაასახელა საუკეთესო გუნდად და მეც დავსახელდი საუკეთესო მოთამაშედ. ამის მერე გამომიძახეს სერია B-ში სათამაშოდ.
– თქვენს ოჯახს რა წვლილი მიუძღვის თქვენს იტალიურ კარიერაში?
– ცხოვრებაში რამეს თუ მივაღწიე, ეს არის ჩემი ოჯახის და დედის დამსახურება, მათი თანადგომის გარეშე არაფერი გამომივიდოდა. მადლობა მინდა გადავუხადო ჩემს უფროს ძმას, რადგან სულ გვერდში მიდგას და ჩემი მოტივატორია, მამას რომელიც ჩემი იმედი და ძალაა, დედა ჩემთვის ყველაფერია, სულ ყველაფერი.
– თქვენი ძმაც სპორტსმენია, გვიამბეთ მასზე…
– ნიჭიერი ფეხბურთელია, გიორგი ჩემი უმცროსი ძმაა. ვგულშემატკივრობ და წარმატებებს ვუსურვებ.
– რა არის თქვენი სამომავლო გეგმა და ასევე ოცნება?
– ალბათ, ყველა ქართველი სპორტსმენის ოცნება, საქართველოს ნაკრებში თამაშია. ჩემი ყველაზე დიდი ოცნებაც ჩვენი ქვეყნის ნაკრებში თამაშია.
ნეტო ბენდელიანი
Tag: ქართველი მორაგბე იტალიაში
ასევე დაგაინტერესებთ: როდესაც იგებენ რომ ქართველი ხარ, შიშით გიყურებენ – იტალიური რაგბის სერია A-ს ქართველი “ბურჯი”
