საბერძნეთში უბილეთოდ მგზავრობისთვის ჯარიმის რაოდენობის გაზრდა იგეგმება, 72 ევროდან 100 ევრომდე – მკაცრდება კონტროლიც.
ათენსა და თესალონიკში საზოგადოებრივი ტრანსპორტის იმ მგზავრებს, რომლებსაც ბილეთი არ ექნებათ, მგზავრობა კიდევ უფრო ძვირი დაუჯდებათ. კონტროლის გამკაცრებასთან ერთად, მოსალოდნელია დასაკისრებელი ჯარიმების მნიშვნელოვანი ზრდა.
ინფორმაციის თანახმად, ინფრასტრუქტურისა და ტრანსპორტის სამინისტროს ახალ კანონპროექტში, რომელიც უახლოეს დღეებში საჯარო განხილვაზე გამოვა, გათვალისწინებულია შემდეგი ცვლილებები: ჯარიმა 100 ევრომდე იზრდება სტანდარტული (90-წუთიანი) ბილეთის შემთხვევაში და 50 ევრომდე — შეღავათიანი ბილეთის მქონე პირთათვის. ეს ნიშნავს, რომ სრული ტარიფის ჯარიმა თითქმის 39%-ით იზრდება, ხოლო შეღავათიანის — 67%-ით (დღეს ჯარიმა ბილეთის ფასის 60-მაგი ოდენობაა და შესაბამისად, 72 და 30 ევროს შეადგენს).
რეგულაციის მიზანია უბილეთოდ მგზავრობის შემთხვევების შემცირება, რომლის ზუსტი მასშტაბები, განსაკუთრებით ავტობუსებსა და ტროლეიბუსებში, ჯერჯერობით ბუნდოვანია.
ჯარიმის კავშირი სამგზავრო ბარათთან
ახალი რეგულაცია ითვალისწინებს ჯარიმის შემცირების შესაძლებლობას სამგზავრო ბარათის შეძენის სანაცვლოდ. კანონპროექტის მიხედვით, დამრღვევს შეეძლება ჯარიმა გაანახევროს, თუ ის განსაზღვრულ ვადაში მინიმუმ 30-დღიან (ყოველთვიურ) სამგზავრო ბარათს შეიძენს.
ყოველთვიური ბარათის შეძენის შემთხვევაში, მგზავრს მოუწევს 50 ევროს გადახდა (ან 25 ევროსი, თუ ის შეღავათიანი ტარიფით სარგებლობს), რასაც დაემატება თავად ბარათის ღირებულება (27 ან 13,5 ევრო).
თუ ჯარიმა დროულად არ იქნება გადახდილი და საგადასახადო ორგანოში გადაიგზავნება, მისი ოდენობა გასამმაგდება, ხოლო მიღებული თანხის ნახევარი შესაბამის სატრანსპორტო უწყებას გადაერიცხება.
აღსანიშნავია, რომ მოქმედი წესით, ჯარიმა 50%-ით მცირდება, თუ მას დაკისრებისთანავე ან 10 კალენდარული დღის განმავლობაში გადაიხდიან. მგზავრს ასევე აქვს უფლება, 60 დღის განმავლობაში შეიტანოს საჩივარი ჯარიმის გაუქმების ან შემცირების მოთხოვნით, თუ ის უსამართლოდ არის გამოწერილი.
