ქართველების ნიჭიერებაზე, თითქმის ყველა ინტერვიუს შესავალში მისაუბრია. თუმცა, ეს ის შემთხვევაა, როცა შეუძლებელია ამ საკითხს გვერდი ავუარო. როცა ერთი ადამიანის შესაძლებლობები, ერთბაშად, სამსახიობო ნიჭს, ცოდნის გაზიარების სურვილსა და ემიგრანტის ცხოვრებისთვის დამახასიათებელი სევდის – პოზიტივით ჩანაცვლებას მოიცავს, ნებისმიერ ქართველს, ბუნებრივად გაუჩნდებოდა სიამაყის შეგრძნება.
ასიათასობით ემიგრანტს შორის, რომ ისეთ ქართველს იპოვი, რომელიც ერთდროულად რამდენიმე სასარგებლო საქმეს აკეთებს ემიგრანტებისთვის, ამაზე სასიამოვნო ცოტა რამ მეგულება. Ermes Tv-ის ერთგული მკითხველი დღეს, ახალგაზრდა მსახიობს გაიცნობს, რომელიც გასულ თვეს (მესამე) ფილმში გადაიღეს. მან, ასევე, იტალიაში, ქალაქ უდინეში, მეგობართან ერთად, ქართველი ემიგრანტებისთვის, ასოციაცია, „პატარა საქართველო“ დააარსა, სადაც მომსახურების სრული პაკეტი, იტალიაში სხვადასხვა საკითხების დეტალიზაციას მოიცავს (იქნება ეს, უძრავი ქონების ყიდვა-გაყიდვა, დოკუმენტების მოწესრიგება, პენსიის მოთხოვნა, თუ სხვა). ხოლო აღნიშნულთან დაკავშირებით სიღრმისეული ინფორმაციის მიღება, უფასოდაა შესაძლებელი. რუბრიკა „გზაჯვარედინის“ კითხვებს, რატი თაბაგარი პასუხობს:
– თავდაპირველად, რამ გიბიძგათ ემიგრაციაში წამოსვლისკენ?! გარემოებებზე, რომ მოგვიყვეთ…
– ყველასთვის ცნობილი მიზეზი, რის გამოც ძირითადად ყველა ემიგრანტი ჩამოდის უცხო მიწაზე, ეს, ოჯახის ეკონომიკური მდგომარეობის მაჩვნებელია – ფინანსური სიდუხჭირე. სამწუხაროდ, ჩვენთვის ძალიან გაჭირდა საქართველოში ცხოვრება და ოჯახმა გადავწყვიტეთ იტალიაში გადმოვსულიყავით.
– როგორი ვითარება დაგხვდათ იტალიაში, “გაგონილს ნანახი სჯობდა”, თუ მოლოდინს გადააჭარბა?!
– ნამდვილად “გაგონილს ნანახი სჯობია”-ო, ზუსტად ისე იყო. რა თქმა უნდა, ტურისტულად როდესაც მოდიხარ, საერთოდ, სხვა რაკურსით უყურებ ყველაფერს და უზომოდ მოგწონს. ნამდვილად ლამაზია იტალია, მაგრამ როდესაც აანალიზებ, რომ აქ უნდა დარჩე და მათივე ქუდი უნდა დაიხურო, მანდ უკვე იწყება ყველაფერი: დეპრესია, მონატრება, ენის ბარიერი, რომელიც საწყისი ეტაპისთვის ნამდვილად რთულია და ა.შ.
– მოგეხსენებათ, იტალიაში მამაკაცებისთვის სამსახურის პოვნა არცისე მარტივია, თქვენს შემთხვევაში როგორ იყო?!
– სამსახურს, რაც შეეხება, არ ვტრაბახობ, მაგრამ ისეთ პირობებში და ისეთ სამსახურებში მაქვს ნამუშევარი, რომ ბევრი ალბათ უარს იტყოდა: ხილის კრეფა, დალაგება, ავეჯის გადაზიდვა, სატვირთო მანქანების დატვირთვა-დაცლა, “ბადანტედაც” მიმუშავია და საერთოდ არ მერიდება, რადგან ვიცი, რომ ყოველთვის პატიოსნად მაქვს ნამუშევარი და ისიც შემიძლია ვთქვა, ახლა სადაც ვარ და რა ეტაპზეც ვარ მისული, ჩემი ჯიუტი ხასიათის დამსახურეებაა. დღესდღეობით კოსმეტიკის ქარხანაში ვმუშაობ, სადაც, კოსმეტიკას ვამზადებ.
– ვიცი, რომ ემიგრანტებისთვის საკმაოდ მნიშვნელოვან საქმიანობას ეწევით, იქნება ეს დოკუმენტების მოწესრიგება, თუ, სხვა რამ… ამასთან დაკავშირებით, ძირითადი დეტალები რომ გვითხრათ…
– დიახ, მე და ჩემმა უახლოესმა ადაიანმა, მიშელ შმაიმ, ქალაქ უდინეში, ასოციაცია “პატარა საქართველო” გავხსენით, რომელის მიზანიც არის ემიგრანტების დახმარება, რადგან ქართველ ემიგრანტებს (აქ) არ ჰქონდათ საშუალება მსგავსი კომფორტის, რომ ქართულ ენაზე მიეღოთ მომსახრება რა მომსახრებებსაც ჩვენ გავცემთ, იქნება ეს საბუთის განახლება, 730, isee უძრავი ქონების შეძენა თუ პენსიების მოთხოვნა და კიდევ, უამრავი რამ, რაც ოფიციალურად „კაფ-პატრონატოს“ ძალებში შედის. ჩვენი ასოციაცია ცდილობს დაეხმარს ქართველ ემიგრანტებს, მოახდინონ ინტეგრირება იტალიაში უფრო მარტივად. გავცემთ უფასო ინფორმაციას, რადგან ჩვენი დევიზი დასაწყისიდანვე იყო, რომ “ინფორმაცია, ყოველთვის უფასო უნდა იყოს”, რადგან სწორი ინფორმაციის მიღება, ემიგრანტის სწორ გზაზე დაყენებას უდრის.
– გარდა ამისა, ჩვენთვის ცნობილი გახდა, რომ რამდენიმე კვირის წინ, ფილმში გადაგიღეს..
– დიახ, იანვარში გადამიღეს ქართულ ფილმში: “7 გაჩერება მზემდე”, რომლის რეჟისორიც შათია ზაბახიძე გახლავთ. ფილმი, ემიგრაციაზეა და ძალიან ბევრი მისტიკა ელოდება მაყურებელს. გარდა ამისა, ორ ფილმში გადამიღეს, რომლებიც უკვე გამოვიდა და მისი ნახვა ინტერნეტ სივრცეში უკვე შესაძლებელია.
– საკმაოდ მრავალრიცხოვანი აუდიტორია გყავთ სოციალური ქსელების სხვადასხვა პლათფორმაზე. რა არის თქვენი კონტენტი?!
– ჩემი სოციალრი ქსელები ჩემთვის ყველაფერია, თავიდან იტალიურის სწავლებით დავიწყე და ბოლოს უკვე იმ დონეზე მივედი, რომ ხალხი ჩემს ვიდეოებს სულმოუთმენლად ელოდა, ეს კონტენტი გადაიზარდა კომედიურ კონტენტში და ჯამში, სამივე პლათფორმაზე (ალბათ) 200 000 გამომწერამდე მყავს. ამ ადამიანებიდან ყველამ იცის, რომ მიყვარს ხუმრობა და ჩემი ეს კონტენტი სრულიად აგებულია ხუმრობაზე, კომედიური ჟანრის ვიდეოები მაქვს. ასევე, ჩვენი ოფისის გვერდი მოიცავს ინფორმაციულ ვიდეობს, სადაც, ემიგრანტებს, იტალიაში სხვადასხვა კანონის შესახებ ინფრომაციას ვუზიარებთ. ჩემი ოცნება იყო მსახიობობა და ამ ჩემი ვიდეოებით, ჩათვალეთ, რომ იმ სურვილს ვიკლავ, რომელიც ვერ ავიხდინე. სამწუხაროდ, ჯერჯერობით, ფეხი ვერ დავდგი დიდ სცენაზე.
– თუ გავითვალისწინებთ იმ ფაქტს, რომ უდინეში სახლი შეიძინეთ, გამოდის, სამშობლოში საცხოვრებლად დაბრუნებაზე არ ფიქრობთ…
– დიახ, სახლი შევიძინე, რადგან სიტუაციამ ასე მოიტანა. რეალობა კი ისაა, რომ ჩემი ამ გადაწყვეტილებით, სამომავლოდ, კარგ ინვესტიციას ვაკეთებ. სამშობლოში ჩემს დაბრუნებას რაც შეეხება, აუცილებლად დავბრუნდები! უცხო მიწაზე, უძრავი ქონების შეძენა არ ნიშნავს, რომ მთელი ცხოვრება აქ ვაპირებ დარჩენას. სამწუხაროდ, ჩემს ქვეყანაში რთული სიტუაციაა და ბევრმა დატოვა იქაურობა. ექიმები და მასწავლებლები მოდიან იქიდან, რადგან შრომა არავის უფასდება.
– რას თვლით, ყველაზე მნიშვნელოვან გამოცდილებად, რაც ემიგრაციამ მოგცათ?!
– ზომიერება! რაც ყველაზე მნიშვნელოვანია. ასევე, დამოუკიდებლობა, რასაც ყველა ავტომატურად სწავლობს, რადგან იტალიაში ყველა დამოუკიდებლად ცხოვრობს. და კიდევ, რაც ყველაზე მთავარია – კომუნიკაცია, ადამიანებთან ურთიერთობა. ყველანაირ რასასთან, ყველანაირ კულტურასთან შეხება მქონდა და ძალიან ბევრი რამ მასწავლა, ადამიანებთან ურთიერთობა ყველაზე მაგარი რაღაცაა, რაც შეიძლება უცხო მიწაზე ნახო.
– თქვენი გეგმების შესახებაც გვიამბეთ: რა სიახლეებს უმზადებთ თქვენს გულშემატკივრებს უახლოეს პერიოდში?!
– ჩემი პირადი, ცხოვრებისეული გეგმაა, რომ მსახიობობის განხრით წავიდე და რაც შეიძლება უფრო და უფრო ბევრმა ხალხმა გამიცნოს. მინდა რაიმე ხერხით, როგორმე ჩემი სამშობლო ვასახელო და მსოფლიოს გავაცნო. იმედია, გამომივა! რაც შეეხება ჩვენი ოფისის გეგმებს, მინდა ძალიან მაგარი სიახლეები მოვახსენო ხალხს: ვაპირებთ გაფართოებას. გეგმაში გვაქვს, რომ ყველა ზონაში დავაარსოთ ასოციაცია, რომელიც ქართველ ემიგრანტებს დაეხმარება ყველაფერში, რაც დასჭირდებათ.
– რედაქციის გადაწყვეტილებით, თითოეული რესპონდენტი, შეკითხვას უტოვებს შემდეგ სტუმარს. წინა ინტერვიუს რესპონდენტმა, ქორეოგრაფმა, იტალიაში ქართული კულტურის ერთგვარმა ატაშემ, შოთა ნასყიდაშვილმა გკითხათ: იმის გათვალისწინებით, რომ უკვე ცხოვრობთ იტალიაში, იცნობთ იტალიასა და იტალიელებს, მაინტერესებს, ემიგრაციაში, რომ მოგიწიოთ განმეორებით ცხოვრება კვლავ იტალიაში იცხოვრებდით, თუ არა?! (რატომ)
– ალბათ, არ ავირჩევდი. ბევრი რამეა, რაც არ მომწონს: ბიუროკრატია, რაც ძალიან დაბალ დონეზეა. ემიგრანტები ძალიან ვიჩაგრებით, რადგან საბუთის განახლებასაც კი, იმდენი დრო სჭირდება, რომ არ ვიცი, რა ვთქვა. იმედია, მიმართულება გამოსწორდება. ტურისტულად ძალიან მომწონს იტალია და ვიმოგზაურებდი, მაგრამ, როგორც ასეთი, საცხოვრებლად, არ მომწონს.
– თქვენ რას შეეკითხებით შემდეგ სტუმარს?!
– რას შეცვლიდი ემიგრაციაში რომ შეგეძლოს? რით დაეხმარებოდი ქართველ ემიგრანტებს, რომ უფრო მარტივად განვითარება შეძლონ?
