თუ იტალიაში ცხოვრობთ, დაქორწინება გსურთ, მაგრამ იტალიური საბუთები არ გაქვთ, ეს პრობლემას არ წარმოადგენს, მეტიც, თქვენ ქორწინების მოტივით შეძლებთ იტალიური ბინადრობის ნებართვის მიღებას, თუ პირი რომელზეც ქორწინდებით იტალიის მოქალაქე, ან იტალიაში ლეგალურად მცხოვრები უცხოელია.
Tag: ქორწინება იტალიაში
ვნახოთ უფრო დეტალურად…
იტალიაში რომ დაქორწინდეთ, ბინადრობის ნებართვა არ არის აუცილებელი. კანონის მიხედვით, უცხო ქვეყნის მოქალაქეს, რომელიც იმყოფება იტალიაში არალეგალურად, მაინც შეუძლია იქორწინოს. საკმარისია პირმა წარადგინოს პირადობის მოქმედი დოკუმენტი და გარკვეული ფორმალობები დააკმაყოფილოს.
და მაინც, როგორ ხდება იტალიაში ქორწინება ბინადრობის ნებართვის გარეშე, რა დოკუმენტებია საჭირო და რა ნაბიჯები უნდა გადადგათ კანონის შესაბამისად?!
საჭირო დოკუმენტები ქორწინებისთვის (EU-ს არაწევრი ქვეყნების მოქალაქეებისთვის):
- პირადობის დამადასტურებელი მოქმედი დოკუმენტი
- ნულა ოსტა – დოკუმენტი, რომელიც ადასტურებს რომ არ არსებობს ქორწინებისთვის დამაბრკოლებელი მიზეზები და რომ პირი თავის სამშობლოში არ იმყოფება ქორწინებაში.
მას გასცემს იტალიაში არსებული უცხო ქვეყნის დიპლომატიური ორგანო, საკონსულო, საელჩო. მნიშვნელოვანია რომ ეს იტალიურ ენაზე გაცემული დოკუმენტი, ასევე იყოს დამოწმებული პრეფექტურის მიერ.
რა ხდება, თუ წარმოშობის ქვეყანა არ გასცემს ნულა ოსტას?
ასეთ შემთხვევაში შესაძლებელია სასამართლოს ჩარევა. სასამართლო გადაწყვეტს, არსებობს თუ არა რაიმე დაბრკოლება ქორწინებისთვის და ნულა ოსტას არქონა ვერ იქნება ქორწინებაზე უარის მიზეზი.
პოლიტიკური დევნილებისთვის:
ნულა ოსტას ნაცვლად უნდა წარადგინოთ
- UNHCR-ის, ანუ გაეროს უმაღლესი კომისარიატის ლტოლვილთა საკითხებში, რომის ოფისის მიერ გაცემული ცნობა
- ნოტარიული აქტი ორი მოწმით
- დევნილის სამგზავრო დოკუმენტი
- პირადობის დამადასტურებელ დოკუმენტი
ქორწინების პუბლიკაცია
მერიაში დოკუმენტების წარდგენის შემდეგ, საჭიროა ქორწინების შესახებ ოფიციალური პუბლიკაცია იმ მუნიციპალიტეტში, სადაც ერთ-ერთი მომავალი მეუღლე ცხოვრობს. პუბლიკაციის ვადა — 180 დღე. ამ ვადაში ქორწინება უნდა განხორციელდეს, წინააღმდეგ შემთხვევაში პროცედურები თავიდან უნდა დაიწყოთ.
რა ხდება ქორწინების შემდეგ ბიუროკრატიის მხრივ?
იტალიის ტერიტორიაზე ჯერ კიდევ არალეგალურად მყოფ ერთ-ერთ მეუღლეს, რომელიც დაქორწინდება იტალიის მოქალაქეზე, ან იტალიაში ლეგალურად მცხოვრებ უცხიელზე, შეუძლია მოითხოვოს ბინადრობის ნებართვა ოჯახური მოტივით.
მოქალაქეობა ქორწინებით — ქორწინებიდან 2 წლის შემდეგ (ან 1 წელში, თუ წყვილს ჰყავს შვილი), უცხოელ მეუღლეს შეუძლია მოითხოვოს იტალიის მოქალაქეობა.
დამატებითი კითხვები:
რამდენ ხანში გაიცემა ბინადრობის ნებართვა ქორწინების შემდეგ?
კანონი ითვალისწინებს 60 დღიან ვადას, მაგრამ პრაქტიკაში პროცესი შესაძლოა რამდენიმე თვე გაგრძელდეს. მაქსიმალური ლეგალური ვადა — 6 თვე.
შეიძლება თუ არა ქორწინების გაუქმება?
დიახ, თუ დადგინდა, რომ ქორწინება გაფორმდა მხოლოდ ბინადრობის ნებართვის მისაღებად, იგი შეიძლება გაუქმდეს.
დამატებითი ინფორმაცია:
იტალიაში ქორწინება ასევე შეუძლია საქართველოს ორ მოქალაქეს, რომლებიც არალეგალურად იმყოფებიან ქვეყანაში. არალეგალის სტატუსი მათ ამ შემთხვევაში არ ზღუდავთ. ქორწინების პროცედურა შესაძლებელია საკონსულოში, წინასწარი ჩაწერით. ამ შემთხვევაში პირებს დასჭირდებათ ქართული მოქმედი პირადობის მოწმობა, ან პასპორტი. საჭიროა ახლდეთ ორი მოწმე, ასევე მოქმედი პირადობის მოწმობით, ან პასპორტით. ბუნებრივია, საქართველოს მოქალაქეებს შორის შემდგარი ქორწინება, როდესაც არცერთ მათგანს იტალიური საბუთები არ აქვს, არ ითვალისწინებს იტალიაში ბინადრობის ნებართვის მიღებას.
