იტალიაში, ფლორენციის პოლიციამ, ტუნისელი არასრულწლოვანი დააკავა, რომელსაც საერთაშორისო ტერორისტულ ორგანიზაცია „isis“-სთან კავშირი, რადიკალური ისლამისტური იდეების პროპაგანდა და ახალი წევრების გადაბირება ედება ბრალად.
მოზარდი პოლიციის თვალთახედვის არეში, ჯერ კიდევ 2025 წლის ოქტომბერში მოხვდა, იმავე დანაშაულისთვის. მაშინ სასამართლომ მას ჰუმანური სასჯელი შეუფარდა და სარეაბილიტაციო ცენტრში მოათავსა, გამოსაცდელი ვადით, რომელიც 2026 წლის მარტში დასრულდა. თუმცა, როგორც კი კონტროლი შეუმცირდა, მოზარდმა მაშინვე ძველი საქმიანობა განაახლა.
გამომძიებლებმა დაადგინეს, რომ ბიჭმა ახალი მობილური ნომერი აიღო და ვებ- პლატფორმებზე ფარულად დაუკავშირდა ტერორისტულ ორგანიზაცია „დაეშის“ წევრებს. მისი ტელეფონის შემოწმებისას, პოლიციამ იპოვა ცნობილი ისლამისტი ტერორისტების ფოტოები და სხვადასხვა რადიკალური მასალები, რომლებსაც ის აქტიურად ეცნობოდა.
იტალიის საიდუმლო სამსახურებმა და ანტიტერორისტულმა კომიტეტმა მოზარდის მიმოწერებში უმძიმესი ფაქტები აღმოაჩინეს: ბიჭი თავის კურატორებს წერდა, რომ მზად იყო მოქმედებისთვის. ის აქტიურად ეძებდა და ინტერესდებოდა ცეცხლსასროლი იარაღის შეძენით. ტერორისტებისგან იღებდა კონკრეტულ ინსტრუქციებს, თუ როგორი ტიპის ხალხმრავალი ადგილი უნდა შეერჩია თავდასხმის განსახორციელებლად.
სასამართლომ მიიღო გადაწყვეტილბა, რომ მოზარდი ამჯერად არა სარეაბილიტაციო ცენტრში, არამედ არასრულწლოვანთა სასჯელაღსრულების დაწესებულებაში გადაიყვანონ. მოსამართლის განცხადებით, ბიჭს ფაქტობრივად არ შეუცვლია თავისი საშიში იდეოლოგიური მრწამსი, პირიქით, პროპაგანდას გამოსაცდელი ვადის დროსაც კი ეწეოდა და მისი თავისუფლებაზე დატოვება საზოგადოებისთვის უმძიმეს საფრთხეს წარმოქმნის. განკარგულება, ფლორენციის პოლიციამ, უკვე სისრულეში მოიყვანა.
ასევე იხილეთ: ᲢᲠᲐᲒᲔᲓᲘᲐ ᲘᲢᲐᲚᲘᲐᲨᲘ – ᲛᲐᲛᲐᲙᲐᲪᲘ ᲛᲐᲜᲥᲐᲜᲘᲗ ᲮᲐᲚᲮᲨᲘ ᲨᲔᲕᲐᲠᲓᲐ, ᲐᲠᲘᲐᲜ ᲛᲫᲘᲛᲔᲓ ᲓᲐᲨᲐᲕᲔᲑᲣᲚᲔᲑᲘ
