ესპანეთში მყოფი ასიათასობით ემიგრანტისთვის 2026 წელი შეიძლება გარდამტეხი აღმოჩნდეს.
Tag: ბინადრობის ნებართვა ესპანეთში
27 იანვარს ესპანეთის მინისტრთა საბჭომ დაამტკიცა ემიგრანტთა საგანგებო რეგულარიზაციის პროცესი სამეფო დეკრეტით (Real Decreto), რომლის მიზანია იმ ადამიანების ლეგალიზება, რომლებიც წლების განმავლობაში ცხოვრობენ და მუშაობენ ქვეყანაში არალეგალურად.
მთავრობის წინასწარი შეფასებით, რეგულარიზაცია შეეხება ნახევარ მილიონზე მეტ მიგრანტს და წარმოადგენს ერთ-ერთ ყველაზე მასშტაბურ ლეგალიზაციის მექანიზმს ესპანეთის უახლეს ისტორიაში.
ვის შეეხება საგანგებო რეგულარიზაცია?
დამტკიცებული ჩარჩოს მიხედვით, რეგულარიზაციის პროცესში მონაწილეობა შეუძლიათ იმ პირებს, რომლებიც აკმაყოფილებენ შემდეგ კრიტერიუმებს:
- იმყოფებოდნენ ესპანეთში 2025 წლის 31 დეკემბრამდე;
- განაცხადის შეტანის მომენტში ქვეყანაში მინიმუმ 5 თვის ყოფნა აქვთ დადასტურებული;
- არ გააჩნიათ ნასამართლეობა არც ესპანეთში და არც წარმოშობის ქვეყანაში.
მიგრაციის საკითხებში პასუხისმგებელი მინისტრის, ელმა საის დელგადოს განცხადებით, განაცხადების მიღება დაიწყება 2026 წლის აპრილის დასაწყისში და გაგრძელდება 30 ივნისამდე.
ოფიციალური ინფორმაციით, საქმეების განხილვის ვადა იქნება მაქსიმუმ სამი თვე, თუმცა პრაქტიკაში ადმინისტრაციული პროცესების გაჭიანურება გამორიცხული არ არის.
რა უფლებებს იძლევა რეგულარიზაცია?
საგანგებო რეგულარიზაცია მიგრანტებს აძლევს რამდენიმე მნიშვნელოვან სამართლებრივ გარანტიას:
- განაცხადის შეტანისთანავე შეჩერდება ადმინისტრაციული დეპორტაციის პროცედურები;
- განაცხადის ფორმალურად მიღების შემთხვევაში გაიცემა დროებითი ბინადრობის ნებართვა, რომელიც იძლევა მუშაობის უფლებას საქმიანობის სფეროსა და გეოგრაფიული შეზღუდვის გარეშე;
- დადებითი გადაწყვეტილების მიღების შემთხვევაში გაიცემა ერთწლიანი ბინადრობის ნებართვა, რომლის ამოწურვის შემდეგ შესაძლებელი იქნება უკვე ჩვეულებრივ ნებართვაზე გადასვლა.
ეს ნიშნავს, რომ რეგულარიზაცია არ არის ერთჯერადი სტატუსი, არამედ გზა სრულფასოვანი ლეგალური ცხოვრებისკენ.
როგორ დავადასტუროთ ესპანეთში ყოფნა?
ესპანეთში ყოფნის დასადასტურებლად ადმინისტრაცია მიიღებს სხვადასხვა ტიპის დოკუმენტს, მათ შორის:
- ისტორიული პადრონი (empadronamiento);
- სამედიცინო ცნობები და ჯანდაცვის ჩანაწერები;
- სოციალური სერვისების დახმარების ცნობები;
- ქირავნობის ხელშეკრულებები;
- ფულადი გზავნილების ქვითრები;
- ტრანსპორტის ბილეთები.
გარდა ამისა, სავალდებულოა მოქმედი პასპორტისა და წარმოშობის ქვეყნის ნასამართლეობის ცნობის წარდგენა.
თავშესაფრის მაძიებლები და არასრულწლოვნები
რეგულარიზაციის პროცესში მონაწილეობა შეუძლიათ თავშესაფრის მაძიებლებსაც, რაც განსაკუთრებით მნიშვნელოვანი სიახლეა იმ ადამიანებისთვის, რომლებმაც წლების განმავლობაში ვერ შეძლეს სტატუსის მიღება არსებული ბიუროკრატიული ბარიერების გამო.
განსაკუთრებული პირობები ვრცელდება ემიგრანტების არასრულწლოვან შვილებზე. მათ მიენიჭებათ 5-წლიანი ბინადრობის ნებართვა, რისთვისაც საჭირო იქნება დაბადების მოწმობების წარდგენა.
Tag: ბინადრობის ნებართვა ესპანეთში
ასევე იხილეთ: “ᲔᲛᲘᲒᲠᲐᲪᲘᲐᲨᲘ ᲬᲐᲛᲝᲡᲕᲚᲐᲛᲓᲔ, ᲛᲔᲒᲝᲜᲐ, ᲠᲝᲛ…” – ᲠᲐᲡ ᲐᲛᲑᲝᲑᲔᲜ ᲔᲛᲘᲒᲠᲐᲜᲢᲔᲑᲘ?!
