მილანში მოქმედი კულტურულ-საგანმანათლებლო ასოციაცია „ქართული სახლი“ ახალ კულტურულ პროექტს იწყებს. ასოციაციის მიერ დაფუძნებული ილია ჭავჭავაძის სახელობის ქართული თეატრი „დებიუტი“ მაყურებლის წინაშე პირველი სპექტაკლით „ჩემო კარგო ქვეყანავ“ წარდგება. პრემიერა 14 იანვარს, მილანის Teatro Lirico-ში გაიმართება. პროექტის მიზანი ქართული ლიტერატურისა და თეატრალური ხელოვნების იტალიური საზოგადოებისთვის გაცნობა და პოპულარიზაციაა.
ERMES TV გთავაზობთ ასოციაცია „ქართული სახლის“ განცხადებას უცვლელად:
“მილანის კულტურულ-საგანმანათლებლო ასოციაცია “ქართული სახლი”, კიდევ ერთი ახალი და გრანდიოზული პროექტით წარსდგება ქართული დიასპორისა და იტალიური საზოგადოების წინაშე.
ასოციაციამ მილანში დააარსა ილია ჭავჭავაძის სახელობის ქართული თეატრი “დებიუტი” და ემზადება პრემიერისთვის, სპექტაკლით: “ჩემო კარგო ქვეყანავ”, რომელიც გაიმართება 14 იანვარს, მილანში, Teatro Lirico-ში.
პროექტის იდეის ავტორი, პროდიუსერი და თეატრის დირექტორი გახლავთ ქალბატონი მაკა გიგიაძე. სწორედ მისი მრავალწლიანი დაუღალავი შრომის დამსახურებაა მიღწეული შედეგები. ისეთ პრესტიჟულ თეატრთან როგორიც მილანის Teatro Lirico-ა, ურთიერთანამშრომლობის ხელშეკრულების გაფორმება არც თუ ისე ადვილი მისაღწევია.
პროექტის მიზანია ქართული ლიტერატურისა და ხელოვნების პოპულარიზაცია იტალიაში!
სპექტაკლები ქართველი კლასიკოსების ნაწარმოებების მიხედვით დაიდგმება და მოწვეულნი იქნებიან მილანისა და ზოგადად იტალიის სკოლებისა და უნივერსიტეტების სტუდენტები და პროფესორები, კულტურის სფეროს წარმომადგენლები, ჟურნალისტები, სრულიად იტალიური საზოგადოება და რა თქმა უნდა ქართული დიასპორა.
პიესები ითარგმნება იტალიურ ენაზე.
სპექტაკლის, “ჩემო კარგო ქვეყანავ” რეჟისორი გახლავთ, ცნობილი რეჟისორი ბატონი გოჩა კაპანაძე, რომელმაც იტალიაში უკვე სამჯერ დადგა ქართული ოპერა, “დაისი” და “აბესალომ და ეთერი”, ორჯერ კატანიის Teatro Massimo Bellini-ში და შემდეგ პარმის Teatro Reale di Parma -ში.
სპექტაკლში მონაწილეობენ ასევე საქათველოდან მოწვეული ცნობი ქართველი მსახიობები:
რუსთაველის ეროვნული თეატრის მსახიობები: ნანა ფაჩუაშვილი, მარინა კახიანი და ნანული სარაჯიშვილი.
რამაზ იოსელიანი, აპოლონ (პოლიკა) კუბლაშვილი, დათო ლიკლიკაძე და თეატრ “დებიუტი”-ს დასის წევრები, რომლებიც მილანსა და ზოგადად იტალიაში მცხოვრები ქართველი ემიგრანტი, პროფესიონალი და მოყვარული მსახიობებისაგან შედგება. სპექტაკლში ასევე მონაწილეობენ ქართველი ემიგრანტი ბავშვები და ასოციაცია ქართულ სახლთან არსებული, მილანის ქართული სიმღერისა და ცეკვის ფოლკლორული ანსამბლი “Herio-ჰერიო”.
მხატვარი – ლომგულ მურუსიძე.
კოსტუმების მხატვარი – ქეთი ციციშვილი.
საღამოს გაუძღვება თეატრმცოდნე, ბატონი ნიკოლოზ წულუკიძე.
ასევე გვსურს განსაკუთრებული მადლობა გადავუხადოთ, პროექტის მხარდამჭერს და ქართული მხარის პროდიუსერს, ქალბატონ მაია პაქსაშვილს, გაწეული შრომისთვის და ამ იდეის განხორციელებაში უდიდესი დახმარებისთვის!
გიწვევთ ყველას, იტალიაში მცხოვრებ ქართველ ემიგრანტებს, ვისაც გაქვთ თეატრალური გამოცდილება ან მონაცემები და სურვილი გახდეთ ამ უდიდესი და ისტორიული პროექტის თანამონაწილე, გიყვართ თეატრი, ცეკვა, სიმღერა, მხატვრული კითხვა და ა.შ.
ასაკი შეუზღუდავია!
თქვენი აქტიურობა და პროექტში ჩართულობა მნიშვნელოვანია, რათა ღირსეულად წარვსდგეთ იტალიური საზოგადოების წინაშე და ღირსეულად წარმოვაჩინოთ ქართული კულტურა და ხელოვნება იტალიაში.
კასტინგსა და სხვა დეტალებზე ინფორმაციას ეტაპობრივად მოგაწოდებთ.
დამატებითი ინფორმაციისათვის დაგვიკავშირდით მითითებულ ტელეფონის ნომერზე: +39 333 975 3319
ჩვენი დევიზი უცვლელია: “ერთად ვაკეთოთ ქართული საქმე!”
