ქართველი ტალანტები მსოფლიოში – დღეს გაგაცნობთ კიდევ ერთ გამორჩეულ ქართველ ქალბატონს – მელანია ბერაძე-თურქმენს, რომელიც თავისი მრავალმხრივი ნიჭით, შრომისმოყვარეობითა და სიყვარულით დაამახსოვრა თავი, როგორც ქართულ, ასევე საერთაშორისო საზოგადოებას.
მელანია წარმოშობით ხარაგაულიდანაა. ბავშვობიდანვე ოცნებობდა ექიმობაზე, თუმცა, პარალელურად ლექსებსა და ნოველებსაც წერდა. მისი განსაკუთრებული სიყვარული ქართული ენისა და ლიტერატურისადმი მოზარდობიდანვე აშკარა იყო. სკოლაში კედლის გაზეთის რედაქტორი გახლდათ, მონაწილეობდა ლიტერატურულ ღონისძიებებში და არაერთი გამარჯვება მოუპოვებია რესპუბლიკურ ოლიმპიადებზე.
მისი პირველი ლექსების კრებული „ფასკუნჯის ფრთები“, 1987 წელს ქუთაისში, ზურაბ კუხიანიძის რედაქტორობით გამოიცა.
ცხოვრებამ მელანია შორს წაიყვანა, სტამბოლში, სადაც შვილთან, გიორგი ჭანკვეტაძესთან ერთად გააგრძელა ცხოვრება, პროფესიული ზრდა და შემოქმედება.
თურქეთში მან სტამბოლის უნივერსიტეტში აირჩია თურქული ენისა და ლიტერატურის მიმართულება. დაამთავრა ფსიქოთერაპევტთა ინსტიტუტი, Omni Hypnosis Academy-ს კურსები და აიდინის უნივერსიტეტში სრულად გაიარა პროგრამა „ცხოვრების ვერტიკალური წრე“ (Life Cycle Coaching / Therapy).
დღეს მელანია არის სამედიცინო ტურისტული კომპანიის, „პირა იდ სზ“ დირექტორი, სხვადასხვა პროფესიული გაერთიანების წევრი, მათ შორის – ფსიქოლოგთა და ფსიქოთერაპევტთა ასოციაციის, ლიტერატურული და ლიდერ ქალთა ორგანიზაციების აქტიური მონაწილე.
მიუხედავად ემიგრაციისა, მელანიას არასდროს გაუწყვეტია კავშირი სამშობლოსთან. იგი არის საქართველოს მწერალთა კავშირის წევრი. ლეჟავას სახელობის აკადემიის აკადემიკოსი.
მისი შემოქმედება არაერთხელ აღინიშნა დამოუკიდებელ საქართველოში. არის „ივერიის“ პრემიის ლაურეატი და დიასპორის გამორჩეული წარმომადგენელი თურქეთიდან. განსაკუთრებული წარმატება მოიპოვა კალიგრაფიის კონკურსშიც, სადაც გამარჯვებული გახდა.
დღეს მელანია ბერაძე სტამბოლში ცხოვრობს ოჯახთან ერთად. ჰყავს,მეუღლე და ორი შვილი, გიორგი და ბარიში.
“დაბადებიდან დღემდე იავნანას ვუმღერი და ისე ვაძინებ ჩემს ერთადერთ შვილიშვილს” – ამბობს მელანია.
მიუხედავად იმისა, რომ უცხო მიწაზე უწევს ცხოვრება, მისი გული მუდამ საქართველოშია. როგორც თავად ამბობს: „აქ, თითქოს სხვაგვარად ამოდის მზე… მაგრამ იმედი გვაქვს, ერთ დღეს აუცილებლად დავბრუნდებით. ამ მიზნისთვის ვემზადებით, ვცხოვრობთ ღირსეულად, ვქმნით, ვშრომობთ და შვილებს ვზრდი ქართველი სულით, როგორც დედამ მასწავლა, სიყვარულითა და ღირსებით.“
მელანია ბერაძე არ ჩერდება მიღწეულზე. მას უამრავი იდეა და მიზანი აქვს. მომავალში… მისი სურვილია, რაც შეიძლება მეტ ადამიანს გაუზიაროს ის გამოცდილება, სითბო და სულიერი ძალა, რომელიც წლების განმავლობაში დააგროვა.
ავტორი: ნინო ლიპარტელიანი
ასევე დაგაინტერესებთ: ქართული ენის პრობლემა ემიგრანტ ბავშვებში – “საქართველოვ, შენ ვინ მოგცა, შვილი დასაკარგავი!”
