ქართველი სპორტსმენები იტალიაში – რაგბის თამაში ადრეულ ასაკში დაიწყო, ფიქრობს, რომ ტრავმისა და კორონავირუსის გამო, დრო დაკარგა, ჩვენ კი ვიტყოდით, რომ 23 წლის ლუკა ბეჭვაია, წარმატებული მოქმედი მორაგბეა, თუმცა, მთავარი წარმატებები წინ აქვს. ითამაშა “დიდი 10”, საქართველოს ჩემპიონატი… ამჟამად, ის იტალიაში Serie A2-ის კლუბ Rugby lecco 1975-ში, ჰუკერის პოზიციაზე თამაშობს.
ლუკა ბეჭვაია: რაგბის თამაში, თერთმეტი წლის ასაკში დავიწყე, კლუბ “ხვამლში“. “ხვამლის” დამფუძნებელი და დღემდე მოქმედი მთავარი მწვრთნელი დავით ცხვედიანი, ახალ გუნდს აყალიბებდა და პატარა მოთამაშეებს იწვევდა.
Tag: ქართველი სპორტსმენები იტალიაში
დადიოდა სკოლებში და არიგებდა მოსაწვევებს. ერთ დღეს ჩვენი სკოლის და ჩვენი კლასის კარიც შემოაღო და დაგვირიგა მოსაწვევები.
რატომღაც, იქვე გადავწყვიტე, რომ ამ სპორტით მინდოდა დავკავებულიყავი და სახლში რომ მივედი, პირდაპირ განვუცხადე ოჯახის წევრებს, რომ რაგბზე ვიწყებდი სიარულს. პირველი რამდენიმე ვარჯიშის შემდეგ, სრულიად მოვიწამლე ამ სპორტით. ყოველდღე და ყოველ წუთს ვარჯიშებზე და თამაშებზე მინდოდა ვყოფილიყავი.
“ხვამლში“ ექვსი წელი დავყავი. ძალიან კარგი წლები, ძალიან ბევრი კარგი მოგონება, მიღწევები, ჩემპიონობები და თამაშები მქონდა ამ გუნდთან. ასევე ნაკრებშიც გამომიძახეს, როდესაც ამ კლუბში ვთამაშობდი. “ხვამლიდან“ გადავედი “არმაზში“, სადაც ასევე საკმაოდ დიდი დრო, ოთხი წელი დავყავი.
– ითამაშეთ “დიდ 10“-ში, აგრეთვე საქართველოს ჩემპიონთა ლიგაში, გვიამბეთ ამის შესახებ…
– დიახ, კლუბ “არმაზმში“ ყოფნასთან მაკავშირებს ძალიან კარგი და მნიშვნელოვანი მოგონებები, იმიტომ რომ “არმაზი” იყო პირველი გუნდი, სადაც ასაკის შესაბამისად, 18 წლისას მომიწია პირველი ლიგის, პროფესიონალური ლიგის თამაში. ასევე ამ პერიოდში 18 წლამდე და შემდეგ 20 წლამდე ნაკრებში გამომიძახეს, გავიარე რამდენიმე შერჩევა.
ამხანაგური თამაშებში, შეიძლება ითქვას, ერთ-ერთი წამყვანი და ძირითადი მოთამაშე გახლდით, მაგრამ რომ იტყვიან სპორტსმენს გამართლება სჭირდება… ერთხელ იყო შემთხვევა, როდესაც ტურნირზე გასასვლელად ტრავმამ შემიშალა ხელი, მეორედ კი, როგორც მთელ მსოფლიოს, კორონავირუსმა, და სამწუხაროდ ასე დავკარგე ნაკრებში თამაშის შანსები.
სამაგიეროდ, ამ ოთხი წლის შემდეგ, გამოჩნდა უკეთესი საფეხური და უფრო მაღალი კლასი, საქართველოს უმაღლეს ჩემპიონატში,”დიდი 10” და ამ ჩემპიონატის ერთ-ერთი ისტორიული კლუბი “აკადემია“ სადაც გადავედი 2023 წელს. შეიძლება ითქვას, რომ იმ წელს საუკეთესო სეზონი ჩავატარე. პირადად ჩემთვის იყო წარმატებული სეზონი, რადგან თავის წარმოჩენა შევძელი.
– კლუბ “აკადემიის“ შემდეგ, მიგიწვიეს იტალიურ კლუბში სათამაშოდ… როგორ მოხვდით იტალიაში?
– როგორც აღვნიშნე, “აკადემიაში” კარგად წარმოვაჩინე თავი, რასაც მოჰყვა ის, რომ როდესაც ზაფხულში უცხოურ გუნდებში გავგზავნე ჩემი მონაცემები, CV და ვიდეო, უეცრად გამოჩნდა იტალიური კლუბი “Rugby lecco 1975”, საიდანაც მომივიდა მოწვევა.
ვიყავი ჩამოსული ზაფხულში ერთი კვირით კლუბის გასაცნობად და სელექციისათვის. მას შემდეგ, რაც გუნდის მხრიდან დავიმსახურე სიმპატია და მეც ასევე მომეწონა გუნდი და სიტუაცია, შევთანხმდით პირობებზე და გავაფორმეთ კონტრაქტი. ვთამაშობ 2 ნომრით. ძალიან კარგ გამოცდილებას ვიღებ აქ. თითქოს სხვა სამყაროში ვარ, ძალიან ბევრი სიახლეა და ვცდილობ, რომ შევეჩვიო ამ ყველაფერს.
– რას გვეტყვით თქვენს იტალიურ გუნდზე?
– ეს გუნდი 1975 წლიდან მოქმედებს. წელს, აპრილში გუნდის 50 წლის იუბილეა. თამაშობდნენ Serie B-ში და წელს პირველად თამაშობენ პროფესიონალურ ლიგაში Serie A2-ში.
– რამდენად განსხვავდება იტალიური და ქართული თამაშის სტილი?
– ძალიან განსხვავებულია. ნელ-ნელა ვეგუები ამ სტილს და რა თქმა უნდა, სამომავლოდ უფრო დიდი გეგმები გვაქვს და მაქვს. ძალიან ბევრს ვვარჯიშობ და ვშრომობ იმისათვის, რომ მომავალ წელს უკეთეს გუნდში ვითამაშო და უკეთესი გუნდები დავაინტერესო ჩემით.
– რას გვეტყვით თქვენს სამომავლო გეგემებზე?
– სამომავლო მიზანი და ოცნება, ალბათ, როგორც ყველასათვის, საქართველოს ნაკრებში თამაშია. ასევე მსურს, რომ იტალიურ წამყვან გუნდებში ვითამაშო, რომლებიც ევროპის ჩემპიონატზე, ე.წ. “ჩელენჯ თასის“ ჩემპიონატში მონაწილეობენ.
ასევე დაგაინტერესებთ: ქართველი სპორტსმენები იტალიაში – სოფია ღურწკაიას კიდევ ერთი წარმატება იტალიაში
