იტალიის ქალაქ პაჩინოში, კუნძულ სიცილიაზე, 12 პირი დააკავეს. ისინი ბრალდებულნი არიან მოხუცებულთა ორი თავშესაფრის და სარეაბილიტაციო ცენტრის შეზღუდული შესაძლებლობის მქონე და ხანდაზმული პაციენტების მიმართ ძალადობასა და არასათანადო მოპყრობაში.
იტალიური მედიის ცნობით, გამოძიება, რომელსაც სირაკუზის პროკურატურა ხელმძღვანელობდა, ადასტურებს, რომ ცენტრების ოცი ბინადარი, ფსიქიკური პრობლემების მქონე პირები და ასევე ხანდაზმულები, წლების განმავლობაში იმყოფებოდნენ ფიზიკური ძალადობის და დამცირების მსხვერპლი.
საქმე აღიძრა მოქალაქეების მიმართვის საფუძველზე, რომლებმაც განაცხადეს, რომ პაციენტები ცხოვრობდნენ მძიმე პირობებში და შესაბამისი მოვლის გარეშე. დადგინდა, რომ იმავე პირების მიერ მართულ სხვა დაწესებულებაშიც თანამშრომლები ბენეფიციარებს ავიწროვებდნენ ხელმძღვანელობის თანხმობით და ზოგჯერ მათი მითითებითაც.
თავშესაფრებისა და სარეაბილიტაციო ცენტრების პერსონალი მიმართავდა ძალადობას, კერძოდ: სილის გაწვნა, დარტყმა, ხელის კვრა, ყვირილი, დამცირება, მუქარა…
საწოლს მიჯაჭვულს ახალგაზრდა ქალს, ფსიქიატრიული პრობლემებით, რომელიც დამოუკიდებლად ვერ იკვებებოდა და იძულებული იყო დახმარება ეთხოვა, ამის გამო დამატებით სჯიდნენ.
გამოძიების თანახმად, ბენეფიციარებს არაკვალიფიციური პერსონალი აძლევდა მედიკამენტებს, ასევე ახორციელებდა ინვაზიურ თერაპიას, რაც მათ ჯანმრთელობას საფრთხეს უქმნიდა.
შედეგად, სამი ობიექტის კონფისკაცია მოხდა, ერთი სრულად დაილუქა. ბინადრები გადაიყვანეს სხვა უსაფრთხო დაწესებულებებში. 5 ეჭვმიტანილი პატიმრობაშია, 7 შინაპატიმრობაში და აკრძალული აქვთ ხანდაზმულების, შეზღუდული შესაძლებლობის მქონე და დაუცველი პირების მოვლისა და მომსახურების სფეროში მუშაობა. კიდევ 4 პირს დაეკისრა პოლიციაში რეგულარული გამოცხადება, აღკვეთის ღონისძიების სახით.
ასევე დაგაინტერესებთ: იტალიაში ჰაკერებმა ათიათასობით ტურისტის პირადი მონაცემები მოიპარეს და „დარკ ვებზე“ გაიტანეს გასაყიდად
