არალეგალური მიგრაცია – იტალიაში, ქალაქ ტრიესტეში არალეგალური მიგრაციის მოტივით, ექვსი პირი დააკავეს.
ტრიესტეს პროვინცია მუჯაში, კონტროლის დროს, პოლიციის ყურადღება, ქალაქის მიმდებარე ტყეში მოხეტიალე ადამიანების ჯგუფმა მიიპყრო. პოლიციის თანამშრომლებმა გადაწყვიტეს დაკვირვებოდნენ მათ. დაახლოებით ნახევარ საათში შენიშნეს ავტომობილი იტალიური სანომრე ნიშნებით, რომელშიც მხოლოდ მძღოლი იმყოფებოდა და მოუწოდებდა ტყეში მოხეტიალე ხუთ ადამიანს ავტომობილში ჩამსხდარიყვნენ.
პოლიციის თანამშრომლებმა გადაწყვიტეს მანქანა გაეჩერებინათ მძღოლისა და მგზავრების ვინაობის დასადგენად.
მძღოლი 21 წლის ჩინეთის მოქალაქე აღმოჩნდა, რომელსაც არ ჰქონდა დოკუმენტები, იტალიის ტერიტორიაზე მუდმივი საცხოვრებელი, მართვის მოწმობა და ავტომობილის დაზღვევა. მას თან მხოლოდ 3000 ევროს ოდენობით ნაღდი ფული აღმოაჩნდა.
მასთან ერთად იმყოფებოდა ხუთი მგზავრი, მათ შორის ერთი არასრულწლოვანი და ერთი ქალი, ყველა ჩინეთის მოქალაქე და არალეგალურად მყოფი იტალიის ტერიტორიაზე. პოლიციის თანამშრომლებმა ექვსივე პირი განყოფილებაში გადაიყვანა, მათი ვინაობის დასადგენად.
გამოძიების დასრულების შემდეგ ახალგაზრდა მძღოლი დააკავეს, ჩამოართვეს ტრანსპორტირებისთვის გამოყენებული ავტომობილი და თანხა. მას ბრალი წაუყენეს არალეგალური იმიგრაციის ხელშეწყობისთვის, ხოლო მისი თანამემამულეების წინააღმდეგ საქმე აღიძრა ქვეყანაში უკანონოდ შესვლის ბრალდებით.
სოფო ჩუთლაშვილი
ასევე დაგაინტერესებთ: ამერიკაში ქართველის მკვლელობისთვის, სამი ქართველი დააკავეს
