7 სექტემბერი კარგი დღე იყო! ჯერ საქართველოს კალათბურთის ნაკრებმა საფრანგეთის ნაკრები დაამარცხა. მიზეზი: თორნიკე შენგელია ფორმაში შევიდა.
ფეხბურთში თურქეთთან დასანანი მარცხის შემდეგ, ბულგარეთის არც თუ ისე ძლიერ ნაკრებთან მოგვიწია შეხვედრა. რაც შეეხება საქართველო-თურქეთის მატჩს: ტრადიციულად ცუდად დავიწყეთ თამაში. სამწუხაროდ, ეს ამბავი რატომღაც ხშირად ხდება, მატჩების დიდ ნაწილს ვიწყებთ ძალიან ცუდად. დაცვა ჩავარდა. პირველი ტაიმის შემდეგ არავის გვქონდა იმის იმედი, რომ რაღაცას შევძლებდით. 70-იანი წლების ლეგენდარული დინამოც კი ხელს ჩაიქნევდა. მეორე ტაიმში თითქოს გაზაფხულიც მოვიდა. ზურიკო დავითაშვილი, რომელსაც ამ მატჩამდე რატომღაც ვერ მოუნახეს ნაკრებში ისეთ პოზიციაზე ადგილი, სადაც ის სრულ პოტენციალს გამოაჩენდა, აფეთქდა და ჩვენს ნაკრებში საუკეთესო იყო. წავაგეთ, მაგრამ უნდა ითქვას – დღეს საქართველოს ნაკრები ბოლომდე იბრძვის რაც ადრე არ გვახასიათებდა და ჩვენი ფეხბურთელები ეგუებოდნენ ხოლმე მარცხს. ჩვენი დღევანდელი ნაკრები სხვა გუნდი გახდა, არ ეპუება დამარცხებას. განსაკუთრებით ხვიჩა კვარაცხელია, რომელიც ასეთ მომენტებში მეგრელი აბრაგივით იქცევა, თვალებიდან ცეცხლს ყრის და ყველაფერზე წამსვლელია. ისიც უნდა აღინიშნოს, რომ ხვიჩა ამას საქართველოს ნაკრებში თამაშის დროს უფრო აკეთებს, ვიდრე საკლუბო გუნდში თამაშისას. არადა, იყო დრო, როდესაც ჩვენი ნაკრების ფეხბურთელები ნაკრებში თამაშის დროს ცოტა “ფეხებს უფრთხილდებოდნენ”, ყოველ შემთხვევაში, მაშინ ასე ჩანდა.
გულწრფელად რომ ვთქვათ, ბულგარეთთან მატჩის წინ ჩვენს მოგებაში ეჭვი არავის ეპარებოდა. არც თუ ისე დიდი ხნის წინ იყო ის ამბავი, რომ მსგავსი დონის გუნდებთან, ფრეც გვიხაროდა. დღეს სხვა ამბიციები გვაქვს და ეს კარგია.
თამაშის განხილვაზე მაინდამაინც თავს არ შეგაწყენთ, უბრალოდ ერთი რამის აღნიშვნა მინდა – დღეს ყველაზე მეტად გვჭირდება ცენტრალური დაცვა, დაახლოებით ჩივაძე-ხინჩაგაშვილის ტანდემის მსგავსი.
თამაშის წინ რა ხდებოდა ქუჩაში: აღმაშენებელზე, სტადიონთან ახლოს, ფეხბურთის 50-60 წლის გულშემატკივარი, უბილეთო მამაკაცების დიალოგი – ვინც ინტერნეტი მოიგონა იმის… და ყველა ტექნოლოგიების სპეციალისტი, გამომგონებელი მოხსენიებულები იქნენ ძალიან ნეგატიურ კონტექსტში. მიზეზი რასაკვირველია იყო ფეხბურთის ბილეთები. დაახლოებით შემდეგი ფრაზები ისმოდა – “დღეს 80 პროცენტი ქალები დადიან, ჩვენ ბილეთი ვერ გვიყიდია” და ისევ ინტერნეტის და ყველაფერი ონლაინის გინება. – “ეს ქალები სელფის გამო დადიან და ჩვენ სტადიონზე ვერ გვინახავს თამაში. – რაღაც უნდა მოვიფიქროთ თორემ სულ გადაგვივლიან, ბოლოს სახლშიც აღარ გვაყურებინებენ ქალები ფეხბურთის მატჩებს”. – “ფედერაციას მოვთხოვოთ, რომ ბილეთების ნაწილი, სტადიონის სალაროებში გაიყიდოს”.
გადაწვდნენ იოზეფ ბლატერსაც – “დავუკავშირდეთ იოზეფ ბლატერს, ეგ კაცური კაცია და მივაწვდინოთ ხმა, მაგან არ იცის ალბათ ბილეთების პრობლემის შესახებ”…
ამ უცენზურო დიალოგის მოსმენაზე ქართული ფილმი “ბურთი და მოედანი” გაგახსენდება ადამიანს. ფეხბურთის ბილეთის გამო დიდი ვნებათაღელვა. დღეს, საქართველოს ფეხბურთის ნაკრების თამაშს, ფასი დაედო.
ჯანმრთელობა ვუსურვოთ იოზეფ ბლატერს და ჩვენს ფეხბურთელებს.
ალექსანდრე სულავა
