მოგესალმებით, მე ნინა მამუკაძე ვარ, ქართულ-იტალიური და დიასპორული მედია “ERMES TV – ერმესი მედიის” დამფუძნებელი და ხელმძღვანელი. პირველ პირში ვსაუბრობ, რადგან ეს უმნიშვნელოვანესი ინფორმაცია, რომელიც თქვენ, ჩვენს მკითხველს უნდა გაგიზიაროთ, პირადი შეტყობინების სახით შემომივიდა, იტალიაში მცხოვრები ქართველი ემიგრანტი ქალბატონის, ნათელა ლიპარტელიანის Natela Liparteliani მხრიდან.
ეს არის ინფორმაცია, რომელიც შესაძლოა სასიცოცხლოდ მნიშვნელოვანი იყოს იტალიაში (ამ ეტაპზე მხოლოდ ფლორენციაზეა საუბარი) მცხოვრები ქართველი ონკოლოგიური პაციენტებისთვის!
მე ქალბატონი ნათელას წერილს, უცვლელად გთავაზობთ:
“გამარჯობა, ნინა! ილოცავთ 2026 წლის დადგომას და მოახლოებულ კალანდას! გისურვებთ ჯანმრთელობას და შემოქმედებით წარმატებას! ბოდიშს გიხდით, უნდა წაგართვათ რამდენიმე წუთი.
გასული წლის 20 ნოემბერს, გავიკეთე ოპერაცია, რადგან ჩვეულებრივ, უბრალო სკრინინგზე (ISPRO), დამიდგინდა მარჯვენა მკერდში პატარა ზომის სიმსივნე, რომელიც ექვემდებარებოდა ამოკვეთას.
… და, ამით დაიწყო.
ოჯახმა, სადაც ვმუშაობ, აღმოაჩინა ასოციაცია: KIARA FOR LIFE
სიტყვებით ვერ აღვწერ, რა თანადგომა გამომიცხადა ამ ასოციაციამ, რომელიც სიმსივნით დაავადებულ პაციენტებს ეხმარება: მაკითხავდნენ და დავყავდი ვიზიტებზე მანქანით; მაცილებდნენ სახლში; ეკონტაქტებოდნენ ქირურგს; ონკოლოგს; მომიგვარეს ყველა ბიუროკრატიული საკითხი; დამეხმარნენ CERTIFICATO DI MALATTIA-ს სწორად გადაგზავნაში და ჩართეს ასევე CASA COLF, რითიც გაიზარდა ჩემი ბიულეტენის თანხა; შემიძინეს ძვირადღირებული სპეციალური ბიუსტჰალტერი; ჰყავთ ფსიქოლოგიც.
ბევრი რომ არ გამიგრძელდეს, იქნებ თქვენ დაინტერესდეთ ამ ასოციაციით, ეს არის ოჯახი, ცოლ-ქმარი, რომელსაც ხუთი წლის წინ, 35 წლის ასაკში, სიმსივნით გარდაეცვალათ ერთადერთი ქალიშვილი კიარა და მისი სახელის უკვდავსაყოფად აკეთებენ ამ კეთილ საქმეს. იმდენად შემძრა ამ ჩემი ტოლი წყვილის (68 წლისანი) ასეთმა კეთლშობილურმა საქმემ, შევპირდი, რომ მოგიყვებოდით თქვენ.თანაც, ისე გახშირდა ემიგრაციაში მყოფი ქალების ავადობა, იქნებ სხვებისთვისაც შვება იყოს ამ ასოციაციასთან ურთიერთობა და მათი ცნობადობა. თქვენი მეშვეობით ეგ შესაძლებელია.”
მე კიდევ ერთხელ უდიდესი მადლობა მინდა გადავუხადო ქალბატონ ნათელა ლიპარტელიანს და ჯანმრთელობა და ყველაფერი საუკეთესო ვუსურვო.
ფოტოზე კიარაა, რომლის სიყვარულითაც მშობლებმა ეს უდიდესი საქმე წამოიწყეს.
ვესაუბრე კიარას დედას, მარია დი მაიონეს და შემძრა ამ ქალბატონის დიდსულოვნებამ და სიძლიერემ:
“ ნინა, მინდა ადამიანებს, რომლებიც ამ ვერაგ დაავადებას ებრძვიან, ჰქონდეთ ის ყველაფერი, რაც კიარას ჰქონდა. მხოლოდ ფიზიკურად არა, მორალურადაც ვუდგავართ მათ გვერდით, რადგან ამ გზაზე, კარგი განწყობა და ადამიანების გვერდით დგომა, ძალიან ბევრს ნიშნავს. ჩვენი ასოციაციის სლოგანია – “სიცოცხლე ყველაფრის მიუხედავად”! ნინა, თქვენ კი მადლობა, იმ საქმისთვის, რასაც აკეთებთ!”
ასოციაციის სახელწოდება, როგორც ზემოთ აღვნიშნე არის: KIARA FOR LIFE
ამ ეტაპზე, ასოციაცია ფლორენციას ფარავს!
ტელ: +39 347 53 57 951 მარია დი მაიონე
ასევე იხილეთ:
