ERMES TV-სა (იტალია) და “გზამკვლევს” (ესპანეთი) შორის, ურთიერთთანამშრომლობის შეთანხმება გაფორმდა!
საზღვარგარეთ, სხვადასხვა ორ დიდ საემიგრაციო ქვეყნაში არსებული ამ ორივე დიდი ქართული პლატფორმის ძირითადი მიზანი საზოგადოების, განსაკუთრებით კი საემიგრაციო საზოგადოების ინფორმირებულობა და რაც მთავრია სრულყოფილი, გადამოწმებული და ობიექტური ინფორმაციის მიწოდება-გავრცელებაა. როგორც ამ ინიციატივის ავტორები, ნინა მამუკაძე და მედეა მამფორია აცხადებენ, ურთიერთმხარდაჭერის პრინციპი საქმის კიდევ უფრო ხარისხიანად კეთების ერთგვარი გარანტიაა.
ნინა მამუკაძე – ქართველი ჟურნალისტი იტალიაში და ქართულ-იტალიური მედიამაუწყებლის ERMES•TV – “ერმესი მედია” დამფუძნებელი.
ნინა მამუკაძე განათლებით, პროფესიით და სამუშაო გამოცდილებით ჟურნალისტია. უკვე 13 წელია ემიგრაციაში, იტალიაში იმყოფება, მაგრამ მთელი ამ პერიოდის განმავლობაში, კავშირი არასდროს გაუწყვეტია საკუთარ პროფესიასთან, თუმცა გარკვეული ეტაპის შემდეგ მივიდა დასკვნამდე რომ დადგა დრო, როდესაც თავად უნდა აეღო სადავეები ხელში. ERMES•TV – “ერმესი მედია”, ოფიციალურად 2023 წლის აგვისტოში დაფუძნდა, ხოლო პირველი ინფორმაცია მაუწყებლის პორტალზე ნოემბრის თვეში განთავსდა.
ERMES•TV – “ერმესი მედია” არის ქართულ-იტალიური ონლაინ მედიამაუწყებელი, რომელიც საკუთარ მკითხველსა და მაყურებელს სთავაზობს ობიექტურ, ორიგინალ და საინტერესო ჟურნალისტურ პროდუქტს. მისი მიზანია, მიმდინარე მოვლენების ობიექტურად გაშუქება, საქართველოს პოპულარიზაცია იტალიასა და მსოფლიოს სხვადასხვა ქვეყნებში, საზღვრებს გარეთ არსებული ქართული დიასპორების გაერთიანება, ქართველ ემიგრანტთა (განსაკუთრებით იტალიაში) ინფორმირებულობა მიმღებ ქვეყნებში არსებული რეალობისა და კანონმდებლობის შესახებ, პრობლემების ზედაპირზე ამოტანა და წარმატებული ემიგრანტების ფართო საზოგადოებისთვის გაცნობა, ისევ და ისევ ქართველი ხალხისა და საქართველოს საკეთილდღეოდ.
“ერმესი მედია” მოიცავს ოფიციალურ პლატფორმას, ფეისბუკის ოფიციალურ ფეიჯს, იუთუბ არხს და აქვს ასევე საემიგრაციო ჯგუფების მხარდაჭერა სოციალურ ქსელებში. ამგვარად, აქვს წვდომა ძალიან დიდ აუდიტორიაზე.
მედეა მამფორია – “გზამკვლევის” დამფუძნებელი (ესპანეთი)
მედეა მამფორია – დამთავრებული აქვს პოლიტიკური მეცნიერებების ფაკულტეტი, ხოლო სპეციალიზაცია პიარისა და მარკეტინგის მიმართულებით გაიარა, ამჟამად ესპანეთში იმყოფება, სადაც 6 წლის წინ გადავიდა საცხოვრებლად. როგორც თავად მედეა ამბობს, მარტივი არ არის პირველი ნაბიჯების გადადგმა ახალ ქვეყანაში, მუდმივად გჭირდება ინფორმაცია სხვადასხვა საკითხების შესახებ, რაც მთავარია სწორი და გაფილტრული.
სწორედ ემიგრაცია იყო მთავარი მიზეზი რამაც გააჩინა იდეა, რომ შექმნილიყო პროექტი „გზამკვლევი“ და დაეწყოთ ამ კუთხით მუშაობა. დაახლოებით ორი წლის წინ, დაიწყეს აქტიურად მუშაობა პროექტის განსახორციელებლად მან და მისმა პარტნიორმა ენო ხუტაშვილმა და დღემდე არიან განვითარების პროცესში. როგორც თავად ამბობს, ეს პროექტი ასევე იყო მისი პირადი გადარჩენაც, რომ საკუთარი პროფესია გადმოეტანა ამ საქმეში და არ დაეკარგა კომუნიკაცია საზოგადოებასთან.
რა არის “გზამკვლევი”?
“გზამკვლევი” არის პლატფორმა, სადაც გაერთიანებულია ევროპის რვა ქვეყანა, პლუს დიდი ბრიტანეთი და ამერიკის შეერთებული შტატები. ამ ქვეყნების მასშტაბით კი ყველა საჭირო ინფორმაცია ემიგრანტებისთვის და მოგზაურებისთვის დაყოფილია კატეგორიებად და სერვისებად. მათი მიზანი იყო და არის, მაქსიმალურად შეაგროვონ ყველა საჭირო ინფორმაცია და რაც მთავარია თავი მოუყარონ ამ ყველაფერს ერთ სივრცეში.
გარდა ამისა „გზამკვლევზე“ შეუძლია ინფორმაცია ატვირთოს ნებისმიერმა ადამიანმა, რომელიც მიიჩნევს, რომ ამა თუ იმ კატეგორიის კრიტერიუმებს აკმაყოფილებს (რა თქმა უნდა, ყველაფერის გადამოწმების შემდეგ). გზამკვლევს ჰყავს პარტნიორები სხვადასხვა ქვეყნებში, რომლებიც ძირითადად წარმოადგენენ იმ ქვეყნის დიასპორას. აქვთ ბევრი პროექტი მიზნად და იმედს იტოვებენ რომ ყველაფერს განახორციელებენ.
P.S. როგორც აღვიშნეთ, ERMES•TV “გზამკვლევის” ოფიციალური საინფორმაციო მხარდამჭერი ხდება და უდიდეს წარმატებას უსურვებს ამ შესანიშნავ პროექტს!
