უცხოეთში მყოფი წვევამდელი ვალდებული იქნება ჯარში გაწვევის შეტყობინების მიღებისთანავე საქართველოში დაბრუნდეს?!
საქართველოს პარლამენტში რეგისტრირებული კანონპროექტის მიხედვით, საზღვარგარეთ დროებით მყოფი წვევამდელები ვალდებული იქნებიან, გაწვევის შესახებ შეტყობინების მიღებისთანავე ქვეყანაში დაბრუნდნენ და შესაბამის კომისიაში გამოცხადდნენ.
ინიციატივა საქართველოს თავდაცვის სამინისტროს ეკუთვნის და იგი დღეს, 6 აპრილს, თავდაცვისა და უსაფრთხოების კომიტეტის სხდომაზე პირველი მოსმენით განიხილება.
ცვლილებები ეხება როგორც „თავდაცვის კოდექსს“, ასევე კანონს „საქართველოს მოქალაქეების საქართველოდან გასვლისა და საქართველოში შემოსვლის წესების შესახებ“.
კანონპროექტით იცვლება წვევამდელთა სამხედრო სამსახურში გაწვევის შესახებ შეტყობინების ჩაბარების წესი. კერძოდ, უწყების ოფიციალურად ჩაუბარებლობა მომავალში აღარ იქნება პასუხისმგებლობისგან გათავისუფლების საფუძველი.
დოკუმენტის მიხედვით, თუ წვევამდელს შეტყობინება პირადად ვერ ჩაბარდება, იგი განთავსდება გაწვევაზე უფლებამოსილი ორგანოს ოფიციალურ ვებგვერდზე არაუგვიანეს მეორე სამუშაო დღისა. ასეთ შემთხვევაში, გამოქვეყნებიდან მეშვიდე დღეს შეტყობინება ჩაბარებულად ჩაითვლება.
ამის შემდეგ, პირს ევალება, ოფიციალური ჩაბარებიდან 10 კალენდარული დღის ვადაში გამოცხადდეს შესაბამის უწყებაში.
კანონპროექტი ასევე ითვალისწინებს იმ ოჯახის წევრების განსაზღვრას, რომელთათვისაც შესაძლებელი იქნება შეტყობინების ჩაბარება. აღნიშნული საკითხი მთავრობის დადგენილებით დარეგულირდება, რომელიც კანონის მიღების შემდეგ მომზადდება.
გარდა ამისა, ტექნიკური ცვლილება შედის საზღვარგარეთ გასვლისა და ქვეყანაში შემოსვლის წესების შესახებ კანონში. ტერმინი „შეტყობინების მიღებისთანავე“ იცვლება ფორმულირებით „შეტყობინების/უწყების ჩაბარებისთანავე“, რაც პირდაპირ ავალდებულებს საზღვარგარეთ მყოფ, გაწვევის ასაკის მქონე მოქალაქეებს, საქართველოში დაბრუნდნენ.
კანონპროექტი ცალკე გამონაკლისს არ ითვალისწინებს საზღვარგარეთ მყოფი მოქალაქეებისთვის, რაც ნიშნავს, რომ გაწვევის ვალდებულება მათზეც ვრცელდება, თუ არ აქვთ გადავადება ან გათავისუფლება.
რა მოხდება, თუ წვევამდელი კომისიაში არ გამოცხადდება?
სავალდებულო სამხედრო სამსახურისთვის თავის მიზანმიმართული არიდება სისხლის სამართლის დანაშაულია.
სისხლის სამართლის კოდექსის 356-ე მუხლის თანახმად, წვევამდელის მიერ სამხედრო სამსახურისათვის თავის არიდება, მათ შორის, ავადმყოფობის სიმულაციით, სხეულის თვითდაზიანებით, ყალბი დოკუმენტის გამოყენებით ან სხვაგვარად მოტყუებით.
ისჯება ჯარიმით ან თავისუფლების აღკვეთით ვადით სამ წლამდე.
მომზადებულია “რადიო თავისუფლების” მასალის მიხედვით
