დაჩი ლორთქიფანიძე – ფიორენტინა VS კრემონეზე (პრიმავერა)
ფლორენციაში, ფიორენტინას ბაზაზე, ვიოლა პარკის სტადიონზე, 23 იანვარს ფიორენტინა-კრემონეზეს (პრიმავერა) შეხვედრა გაიმართა. მატჩი მასპინძელთა უპირატესობით დაიწყო და ორივე გოლი, პირველი ტაიმის პირველივე ნახევარში (9′ და 16′ წუთებზე) გავიდა. ლორთქიფანიძისა და სპაჯარის მცდელობის მიუხედავად, პირველ ტაიმში ანგარიშის ცვლილება არ მომხდარა. მატჩის ბედი ვერ შეცვალა მეორე ტაიმში სახიფათოდ გააქტიურებულმა კრემონეზემ და ახლაშესულმა ნაჰრუნდის მცდელობამაც. ვიოლამ კარის დაცვა შეძლო, შეინარჩუნა ორი გოლის უპირატესობა და მატჩი ანგარიშით 2 – 0 დასრულდა. წაგებული მატჩის მიუხედავად, კრემონეზეს რიგებიდან განსაკუთრებით გამოირჩეოდა გუნდის ქართველი კაპიტანი დაჩი ლორთქიფანიძე. მან ერთ-ერთი ყველაზე მაღალი შეფასებაც მიიღო.
ცოტა რამ დაჩის და იტალიური ახალგაზრდული ლიგების შესახებ
დაჩი ლორთქიფანიძე:
2005წ, კრემონეზე (პრიმავერა), სერია ბ, კონტრაქტი 2027 წლამდე. დაჩი ატალანტას აკადემიაში გაიზარდა, სადაც ოთხი წელი ითამაშა. 14 წლიდან კრემონეზეს აკადემიაშია. უკვე სამი წელია გუნდის კაპიტანია. გუნდმა გასულ წელს პრიმავერა 2 მოიგო. 20 ქულით გაასწრო პარმას და პრიმავერა 1-ში გადავიდა.
მოკლე ექსკურსი იტალიურ ახალგაზრდულ ლიგებზე:
პრიმავერას ჩემპიონატი ეს არის U20-ის, ან როგორც მეორენაირად უწოდებენ, დუბლშემადგენლობების ჩემპიონატი. იტალიაში არსებობს პრიმავერა 1, 2, 3 და პრიმავერა 4. პრიმავერა 1, ან მინი სერია A ტარდება 20 გუნდს შორის და საინტერესო ისაა რომ აქ სერია ა, ბ და ც-ს გუნდების დუბლებს, ანუ მათ U20 გუნდებს შეუძლიათ თამაში.
პრიმავერა 1-ის დონე საკმაოდ მაღალია, მაგრამ ბოლო წლებია ყველა აღნიშნავს, რომ ეს დონე წლიდან წლამდე ეცემა. ბევრი ამას საფეხბურთო აკადემიების არცთუ კარგ მუშაობას აბრალებს, ბევრიც – მრავალი, არცთუ “ხარისხიანი” უცხოელებით ბავშვთა ლიგების გადავსებას და ა.შ. პრიმავერა 1-ის ყველა თამაში, ლაივშია წარმოდგენილი სპორტიტალია (მე-60 არხი) და იქვე, პრიმავერა ტვ-ზე. აქედან გამომდინარე, ინტერესი და პოპულარობა ძალიან დიდია.
ქართველები “პრიმავერაში”
რაც შეეხება პრიმავერაში ქართველებს, ახლა მხოლოდ დაჩი ლორთქიფანიძეა წარმოდგენილი. იგი კრემონეზეს U20-ის კაპიტანი და საქართველოს U21 ნაკრების წევრია. ადრე პრიმავერაში თამაშობდნენ ლევან მჭედლიძე (ემპოლი), რომან ჭანტურია (ემპოლი), და დაჩის ძმა, დავით ლორთქიფანიძე (ატალანტა, პადოვა). რომან ჭანტურია, პრიმავერას 2015-16 წლების სეზონში, ბომბარდირთა დავაში, მეორე ადგილზე გავიდა 16 გატანილი გოლით. დანარჩენი ქართველები, ვინც აქ ბავშვთა ლიგებში იყვნენ (დაახლოებით 20) პრიმავერაში ვერ მოვიდნენ.
არის საუბრები, რომ იტალიაში, როგორც ინგლისში შეიქმნას U23 ლიგა, მაგრამ რეალურად ჯერ არაფერია. ამასობაში იუვენტუსმა, ატალანტამ და მილანმა შექმნეს თავიანთი U23 გუნდები, რომლებიც სერია ც-ში გამოდიან.
ასევე დაგაინტერესებთ: ასეთი სტატია რომ 10 წლის წინ წამეკითხა – თუ პატარა ფეხბურთელს ზრდით!
