იტალიაში კანონით დაცულია ჯანმრთელობაზე ზრუნვის უფლება მათთვისაც, ვინც ევროკავშირის არაწევრი ქვეყნებიდან ჩადის, ან პირი იტალიის ტერიტორიაზე არალეგალურად იმყოფება.
ერთ-ერთი მექანიზმი, რომელიც ამისთვის არსებობს, არის Permesso di soggiorno per cure mediche – ბინადრობის ნებართვა მკურნალობის მოტივით. ეს არის დოკუმენტი, რომელიც უცხოელ მოქალაქეებს აძლევს უფლებას მიიღონ სამედიცინო მომსახურება იტალიაში, როცა მათი ქვეყნის ჯანდაცვის სისტემა ვერ უზრუნველჰყოფს საჭირო მკურნალობას, ან მკურნალობის შესაბამის დონეს. მას გასცემს ქვესტურა.
ვის შეუძლია ამ ტიპის ბინადრობის ნებართვის მიღება იტალიაში?
- ევროკავშირის არაწევრი ქვეყნების მოქალაქეებს, რომლებსაც სჭირდებათ კონკრეტული სამედიცინო მკურნალობა იტალიაში;
- მკურნალობის საჭიროების მქონე უცხოელი არასრულწლოვანის მშობლებს, ან ოფიციალურ თანმხლებ პირს.
ბინადრობის ეს ნებართვა განკუთვნილია როგორც იმ პაციენტებისთვის, რომლებიც სპეციალურად მკურნალობისთვის ჩადიან იტალიაში, ასევე მათთვის, ვინც უკვე იმყოფება იტალიაში და სჭირდება გადაუდებელი ან ხანგრძლივი მკურნალობა.
როგორ ხდება ნებართვის მიღება?
არსებობს ორი გზა:
1. იტალიაში შესვლა სამკურნალო მოტივით მიღებული ვიზით
იტალიაში ჩასვლის წინ, საკუთარ ქვეყანაში მყოფმა პირმა უნდა მიმართოს იტალიის საკონსულოს ან საელჩოს სამედიცინო მოტივით ვიზის მისაღებად.
ამისთვის საჭიროა:
- იტალიური (საჯარო ან აკრედიტირებული) სამედიცინო დაწესებულების ცნობა, რომელიც ადასტურებს მკურნალობის საჭიროებას;
- ფინანსური შესაძლებლობის დამადასტურებელი საბუთები მკურნალობის, საცხოვრებლისა და ცხოვრების ხარჯების დასაფარად;
- ჯანმრთელობის დაზღვევა ან ფინანსური გარანტია (იურიდიული პირის ან კერძო პირის მხრიდან).
2. ბინადრობის ნებართვის მიღება ადგილზე იტალიაში
თუ პირი უკვე იმყოფება იტალიის ტერიტორიაზე და მისი დაბრუნება სამშობლოში შეუძლებელია სერიოზული სამედიცინო მიზეზების გამო,
ეს ნებართვა გაიცემა ვიზის გარეშე, ოღონდ საჭიროა ოფიციალური სამედიცინო ცნობა, რომელიც ადასტურებს მკურნალობის სირთულესა და ხანგრძლივობას.
საჭირო დოკუმენტები
ქვესტურაში განაცხადის გასაკეთებლად საჭიროა:
- პასპორტი ან მოქმედი სამგზავრო დოკუმენტი;
- ოფიციალური სამედიცინო ცნობა;
- ფინანსური და სადაზღვევო დოკუმენტაცია;
- სამედიცინო ვიზის ასლი (არსებობის შემთხვევაში);
- არასრულწლოვანთა შემთხვევაში მშობლის თანხმობა და ნათესაური კავშირის დამადასტურებელი დოკუმენტები.
თუ პირი უკვე იტალიის ტერიტორიაზე იმყოფება, საკმარისია პირადობის დამადასტურებელი დოკუმენტი და სამკურნალო დაწესებულების მიერ გაცემული ოფიციალური დასკვნა. არასრულწლოვანის შემთხვევაშ, იგივე.
ვადა და განახლება
ბინადრობის ნებართვა მოქმედებს მკურნალობის დასრულებამდე, იმ ვადით, რაც მითითებულია სამედიცინო დოკუმენტებში, მაგრამ ხანგრძლივობის მაქსიმუმი ერთი წელია..
შესაძლებელია განახლდეს, თუ მკურნალობა ჯერ არ დასრულებულა, შესაბამისი ახალი სამედიცინო ცნობის წარდგენით.
მკურნალობის დასრულების შემდეგ ნებართვა აღარ განახლდება, გარდა იმ შემთხვევისა, როცა პირი უკვე აკმაყოფილებს სხვა ტიპის ნებართვის (სწავლის, სამუშაოს, საერთაშორისო დაცვის და ა.შ.) მიღების პირობებს.
შეიძლება თუ არა მისი კონვერტირება სხვა ტიპის ბინადრობის ნებართვად?
როგორ წესი, არა.
თუმცა, არის გამონაკლისი შემთხვევები როდესაც კონვერტაცია დაშვებულია – როცა სამშობლოში დაბრუნება ჯანმრთელობისთვის ან სიცოცხლისთვის სერიოზულ საფრთხეს წარმოადგენს, ან როცა მკურნალობის პერიოდში სხვა კანონიერ საფუძველი ჩნდება იტალიაში დარჩენისთვის.
იძლევა თუ არა მუშაობის უფლებას?
არა! მკურნალობის მიზნით გაცემული ნებართვა არ იძლევა მუშაობის. მისი ერთადერთი მიზანია სამედიცინო დახმარების მიღება. თუმცა, არის გარკვეული შემთვევები, როდესაც შესაძლებელია მუშაობა, როდესაც ნებართვა გაცემულია საემიგრაციო კანონის შემდეგი მუხლით – Permesso ai sensi dell’art. 36 TUI
უფლებები
ამ ტიპის ბინადრობის ნებართვის მფლობელს აქვს უფლება:
- მიიღოს სრულყოფილი სამედიცინო მომსახურება, რასაც იტალიის ეროვნული ჯანდაცვის სისტემა (SSN) გულისხმობს;
- მიიღოს გადაუდებელი და უწყვეტი სამედიცინო დახმარება;
- არ გააძევონ ქვეყნიდან მკურნალობის დასრულებამდე;
- საჭიროების შემთხვევაში, ჰყავდეს თანმხლები პირი, რომელზეც ასევე გაცემული იქნება შესაბამისი ნებართვა.
დასკვნა
ბინადრობის ნებართვა მკურნალობის მოტივით წარმოადგენს ჰუმანიტარული და ჯანდაცვის დაცვის რეალურ ფორმას, რომელიც ადამიანის ჯანმრთელობას აყენებს ცენტრალურ ადგილას.
ის ჩვეულებრივ არ იძლევა მუშაობის უფლებას და არ არის განკუთვნილი იტალიაში მუდმივად დარჩენისთვის, მაგრამ უზრუნველჰყოფს უსაფრთხო და კანონიერ საფუძველს სასიცოცხლოდ აუცილებელი ან სარეაბილიტაციო მკურნალობის მისაღებად იტალიაში.
ასევე იხილეთ:
🟡 ᲘᲢᲐᲚᲘᲣᲠᲘ ᲡᲐᲓᲦᲔᲡᲐᲡᲬᲐᲣᲚᲝ ᲓᲐ ᲣᲥᲛᲔ ᲓᲦᲔᲔᲑᲘ, “ᲤᲔᲡᲢᲔᲑᲘ”- ᲠᲐ ᲣᲜᲓᲐ ᲘᲪᲝᲓᲔᲗ?!
