ბულგარეთის საკურორტო სოფელ ლოზენეცში, საქართველოს 21 წლის მოქალაქე დააკავეს, რომელსაც 24 ავღანელი არალეგალი მიგრანტი მიკროავტობუსით გადაჰყავდა. ფაქტზე ინფორმაცია ბულგარეთის სასაზღვრო პოლიციის დეპარტამენტის დირექტორმა, ანტონ ზლატანოვმა გაავრცელა. Tag: არალეგალური მიგრაცია
როგორც ბულგარური მედია იტყობინება, სამართალდამცველებმა მძღოლი 23 აგვისტოს ბურგასის რაიონში მდებარე სოფელ ლოზენეცში გააჩერეს, თუმცა, იგი თავდაპირველად პოლიციის მოთხოვნას არ დაემორჩილა და შემთხვევის ადგილიდან ტაქსით მიიმალა. პოლიციის სამძებრო მოქმედებების შედეგად, საქართველოს მოქალაქე მეორე დღეს, 24 აგვისტოს, დილით, ბულგარეთ-თურქეთის საზღვართან, კარააღაჩის საკონტროლო-გამშვებ პუნქტთან დააკავეს.
გამოძიების პირველადი ინფორმაციით, მიკროავტობუსში მყოფი 24 მიგრანტი ავღანეთის მოქალაქეა, რომლებიც არალეგალურად ცდილობდნენ ბულგარეთის ტერიტორიაზე გადაადგილებას. სავარაუდოდ, ისინი ბულგარეთის გავლით ევროკავშირის სხვა ქვეყნებში მოხვედრას ცდილობდნენ. ბულგარული მედიასაშუალებების ცნობით, დაკავებულ პირს მიგრანტთა არალეგალურ გადაყვანის ბრალდებით სისხლის სამართლის მუხლი ემუქრება, რაც ბულგარეთის კანონმდებლობით მძიმე დანაშაულად ითვლება და მრავალი წლით თავისუფლების აღკვეთას ითვალისწინებს.
ეს შემთხვევა მხოლოდ ერთ-ერთი მაგალითია იმ მზარდი პრობლემისა, რაც ბულგარეთს ბოლო წლების განმავლობაში აქვს არალეგალურ მიგრაციასთან დაკავშირებით. ადგილობრივი სამართალდამცველები სისტემატურად აჩერებენ ტრანსპორტს, რომელსაც არალეგალი მიგრანტებს გადაჰყავს, და ამაში საქართველოს მოქალაქეების მონაწილეობა არც თუ იშვიათია.
ბულგარეთის შსს აცხადებს, რომ მსგავსი ოპერაციები რეგულარულად ტარდება და მიგრანტების არალეგალურ ტრანსპორტირებასთან ბრძოლის ფარგლებში თანამშრომლობენ პარტნიორ ქვეყნებთან, მათ შორის საქართველოსთანაც. გამოძიება გრძელდება, ხოლო საქართველოს დაკავებული მოქალაქის მიმართ, შესაბამისი სამართლებრივი პროცედურები მიმდინარეობს.
Tag: არალეგალური მიგრაცია
ასევე დაგაინტერესებთ: იტალია – სასამართლომ მიგრანტების სასარგებლოდ ისტორიული გადაწყვეტილება მიიღო – ქვესტურის სისტემა დისკრიმინაციულად სცნო
